काठमाडौं – राप्रपा नेपालका अध्यक्ष कमल थापा प्रत्यक्ष चुनाव नलड्ने भएका छन् । चुनावी अभियानलाई व्यवस्थित, प्रभावकारी एवं योजनावद्ध ढंगबाट नेतृत्व प्रदान गर्न उनलाई पार्टीले समानुपातिक सूचीमा राखेको उनका प्रेस सल्लाहकार तथा केन्द्रीय सदस्या मोहन श्रेष्ठले बताए ।
यसअघि गत शुक्रवार राप्रपा नेपालले अध्यक्ष थापालाई भावी प्रधानमन्त्री प्रस्ताव गर्दै १९६ जना उम्मेदवार सार्वजनिक गरेको थियो । अघिल्लो संविधानसभा चुनावमा थापा काठमाडौं ५ र मकवानपुर १ बाट पराजित भएका थिए ।
राप्रपा नेपालले बरिष्ठ नेता केशरबहादुर विष्टलाई ललितपुर १ बाट चुनाव लडाउने भएको छ । उसले बुधवार थप ३९ निर्वाचन क्षेत्रमा उम्मेदवार सार्वजनिक गरेको छ । यस्तै सहायक महामन्त्री राजाराम श्रेष्ठलाई काठमाडौं ५ बाट उम्मेदवार बनाएको छ । EKANTIPUR
आश्विन १६ गते, २०७० मा प्रकाशित
