ताप्लेजुङको धुसेनी भीरमा भएको सवारी दुर्घटनामा ८ जनाको मृत्यु भएको छ । १० जना घाइते भएका छन् ।
पाँचथरको फिदिमबाट ताप्लेजुङ तर्फ आउँदै गरेको मे १ ज १४३७ नम्बरको पिक अप भ्यान सोमबार अपराहृन मेची राजमार्ग अन्तर्गत दोखु गाविस ६ मा पर्ने धुसेनी भीरमा दुर्घटनामा भएको हो । गाडी सडकबाट झण्डै ३ सय मिटर तल खसेको छ ।
घटनास्थलमा रहेका अनलाइनखबरकर्मी रविन भट्टराईका अनुसार अहिले उद्दार कार्य जारी छ । उद्दारका क्रममा एक बच्चासहित ८ जनाको शव भेटिएको छ । उनीहरु मध्ये सवारी धनी खगेन्द्र श्रेष्ठको पहिचान भएको छ भने गाडी चालक श्याम भनिएपनि थर खुलेको छैन ।
१० जना घाइतेको उद्दार गरिएको छ । उनीहरुको जिल्ला अस्पतालमा उपचार भइरहेको छ । उनीहरुको अवस्था गम्भीर छ ।
कार्तिक ११ गते, २०७० मा प्रकाशित
