मुलुकभरि सामनुपातिकतर्फको मतगणना जारी, प्रत्यक्षतर्फ कांग्रेसको १०० औ जित

काठमाडौ  – पछिल्लो मत परिणाम अनुसार धनुषा ३ बाट बिमलेन्द्र निधि विजयी भएसँगै कांग्रेसले संबिधानसभामा एकसय सिट पक्का गरेको छ ।

देशभर नौ स्थानमा मतगणना जारी रहँदा कांग्रेसले बिभिन्न स्थानमा अग्रता कायमै राखेको छ ।

अघिल्लो निर्वाचनको तेस्रो शक्ति एमालेले अहिले ८९ स्थानमा जित भेट्टाएको छ । केही स्थानमा उसको अग्रता कायम छ ।

पछिल्लो पटक एमाओवादकी महेन्द्रबहादुर शाही कालिकोट-१ बाट विजयी भएका छन् । शाहीको जितसँगै एमाओवादीको २५ सिट सुरक्षित भएको छ ।

मतगणना स्थलबाट आफ्ना प्रतिनिधिलाई बाहिरिने निर्देशन दिएको एमाओवादीले मतदानमा धाँधली भएको आरोप लगाउँदै आएको छ । कालिकोटमा भएको मतगणनामा भने एमाओवादी प्रतिनिधि उपस्थित थिए ।

हालसम्मको मतपरिणाम अनुसार तराई मधेश लोकतान्त्रिक पार्टीको ४ सिट सुरक्षित छ । अध्यक्ष महन्थ ठाकुर सर्लाहीमा पराजित भएपनि अन्य उम्मेदवारले संबिधानसभामा पार्टीको प्रतिनिधित्व गर्ने निश्चित भएको छ ।

विजय कुमार गच्छेदार नेतृत्वको मधेशी जनाधिकार फोरम लोकतान्त्रिकले ४ स्थानमा जित हात पारेको छ ।

राष्ट्रिय प्रजातन्त्र पार्टोले ३ स्थानमा जित हात पारेको छ । अध्यक्ष सुर्यबहादुर थापा स्वास्थ्यको कारण देखाउँदै निर्वाचनमा सहभागी भएका थिएनन् । उनका पुत्र सुनिल थापा धनकुटा २ बाट विजयी भए ।

मधेशी जनाधिकार फोरम नेपालले २ सिट जितेको छ । अध्यक्ष उपेन्द्र यादव र अभिषेकप्रताप साहले संबिधानसभामा पार्टोको प्रतिनिधित्व गर्नेछन् ।

सद्भावना पार्टीले १ सिट मात्र जितेको छ भने नेपाल मजदुर किसान पार्टीका अध्यक्ष नारायणमान बिजुक्छे भक्तपुर १ बाट विजयी भएका छन् ।

संबिधानसभामा तराई मधेश सद्भावना पार्टीको तर्फबाट एक जनाको प्रतिनित्व हुनेछ भने कपिलवस्तु २ बाट विजयी अतहर कमलले स्वतन्त्र उम्मेदवारको रुपमा विजयी भएर संबिधान सभामा उपस्थिति जनाउँने भएका छन् । EKANTIPUR

---