भक्तपुरको नगरकोटमा रहेको होटल भ्यू प्वाइन्टमा दुई चिनियाँ पुरुष पर्यटक मृत अवस्थामा भेटिएका छन् ।चिनियाँ पर्यटकको टोलीसँगै आएका ५५ वर्षका चिन डन र ६२ वर्षका साइ हङ्युन एउटै कोठामा मृत फेला परेका हुन् ।
शुक्रबार राति खाना खाएर एउटै कोठामा सुतेका दुईजना पर्यटक विहान अबेरसम्म नउठेपछि होटल सञ्चालक दिनेश श्रेष्ठ र चिनियाँ पर्यटकको टोली नेतासहितले ढोका फुटाएर हेर्दा मृत अवस्थामा भेटिएको होटलले जनाएको छ ।
मृत अवस्थामा पर्यटक भेटिए लगत्तै भक्तपुरको नगरकोट प्रहरी प्रभागबाट गएको प्रहरी टोलीले प्रारम्भिक अनुसन्धान सुरु गरेको छ भने काभ्रेबाट अनुसन्धान टोली सहितको प्रहरी टोली आएर अनुसन्धान सुरु गरेको छ । पर्यटकको ज्यान जानुको कारण खुल्न नसकेको प्रहरीको भनाइ छ ।
मंसिर २८ गते, २०७० मा प्रकाशित
