काठमाडौ – चिकित्साशास्त्र अध्ययन संस्थानमा डिन नियुक्तिको विषयलाई लिएर आमरण अनशनमा बसेका प्राध्यापक डा. गोविन्द केसीको स्वास्थ्यमा प्रतिकुल असर पर्ने लक्षण देखिन थालेको छ ।
उनको स्वास्थ्य परिक्षणमा संलग्न चिकित्सकका अनुसार केसीको पिसाबमा एसिटोन पोजिटिभ देखिएको छ । उनको टाउको दुख्ने र कमजोरीको समस्या पनि देखिएको छ । विस्तारै उनको स्वास्थय स्थिति कमजोर हुँदै गएको छ ।
आज उनको अनसनको तेस्रो दिन हो । यसअघि उनी दुई पटक अनसन बसिसकेका छन् । एकपटक ४ दिन र अर्को पटक ६ दिन अनसन बसेका थिए । पछिल्लो अनसनमा उनलाई आईसीयूमा राखिने अवस्था देखिएपनि उनको अडानका कारण त्यहाँ लगिएन ।
चिकित्साशास्त्र अध्ययन संस्थानमा डिन नियुक्तिको विषयलाई लिएर विरोधमा उत्रिएका प्राध्यापक गोविन्द केसीले आफ्नो अनशन मेडिकल माफिया र राजनीतिक हस्तक्षेप विरुद्धको लडाइँ भएको बताएका छन् । उनको आमरण अनशन आइतबार दोस्रो दिनसमेत जारी रह्यो ।
निजी मेडिकल कलेजलाई सम्बन्धन दिन राजनीतिक दल, उपकुलपति, रेक्टर रजिस्ट्रारलगायत बीच करोडौं चलखेल भएर नयाँ डिनमा डा. शशि शर्मा नियुक्त भएको उल्लेख गर्दै डा.केसीले धेरै कनिष्ठ र विवादास्पद छवि भएकालाई रोज्नुपर्ने कारण संस्थानका सबैलाई थाहा भएको बताए । डिन नियुक्ति गैरकानुनी प्रक्रियाबाट भएको उल्लेख गर्दै उनले ‘पाइप लाइन’ का मेडिकल कलेजहरूलाई सम्बन्धन दिने प्रक्रिया गैरकानुनी रूपमै आएको बताए ।
त्रिवि पदाधिकारीहरूले प्रहरीको मेडिकल कलेज, काठमाडौं नेसनल र मनमोहन मेडिकल कलेजलाई सम्बन्धन दिनुुपर्ने र पिपुुल्स डेन्टल कलेजलाई मेडिकल कलेजमा परिवर्तन गनर्ुुपर्ने दबाब दिएपछि प्राध्यापक सायमीले डिनबाट राजीनामा दिएको केेसीले बताए । ‘स्वच्छ छविका वरिष्ठ र कार्यक्षमता भएकालाई पाखा लगाउने कामले अन्ततः संस्थान धराशयी हुन्छ र चिकित्सा अध्ययन र सेवा नै बर्बाद हुन्छ,’ उनले भने ।
संस्थानलाई छुट्टै चिकित्सा विश्वविद्यालयका रूपमा विकसित गरेमात्र मुलुकको स्वास्थ्य क्षेत्रमा सकारात्मक परिवर्तन आउने डा. केसीको भनाइ थियो । त्रिवि पदाधिकारीहरूले आर्थिक र राजनीतिक चलखेलका आधारमा आफ्ना मतियारहरू राखेर संस्थान सञ्चालन गर्न खोजिरहेको आरोप उनले लगाए । ‘संस्थानले आफैंमा विश्वविद्यालयको काम गरिरहेको छ । यसलाई स्वायत्त रूपमा क्षमता भएका वरिष्ठ र स्वच्छ पदाधिकारीहरूले चलाए मुलुकको स्वास्थ्य क्षेत्रमा आमूल परिवर्तन आउँछ,’ उनले भने ।
अनशन स्थलमा पूर्वप्रधानमन्त्री बाबुराम भट्टराई, राष्ट्रसंघका पूर्वस्थायी प्रतिनिधि जयराज आचार्य लगायतका व्यक्तिहरू पुगेर आन्दोलनप्रति ऐक्यबद्घता जनाएका थिए । डा.भट्टराईले संक्रमणकालमा आफ्नो हकका निम्ति संघर्ष गर्नुपर्ने बताए ।
चिकित्साशास्त्र अध्ययन संस्थानका नवनियुक्त डिन डा.शशि शर्माले आइतबार दिउँसो कार्यभार सम्हालेका छन् । उनको पदस्थापन हुँदा त्यहाँ शिक्षण अस्पताल र संस्थानका उच्च पदाधिकारी अनुपस्थित थिए । उनको पदस्थापनामा महाराजगन्ज क्याम्पसका प्रमुख डा.जीवन श्रेष्ठ, शिक्षण अस्पतालका निर्देशक डा.भगवान कोइराला, संस्थानका सहायक डिनहरू डा.शरद वन्त, डा.विमल सिन्हा, डा.सरला श्रेष्ठ, डा.भरतमणि पोखरेल लगायतका पदाधिकारी अनुपस्थित थिए । ‘डा.शर्मा पद सम्हाल्दा हामी कुनै पनि पदाधिकारी गएनौं, यो हाम्रो विरोध हो,’ संस्थानका एक पदाधिकारीले भने, ‘हामी मात्र नभएर धेरै वरिष्ठ प्राध्यापक, फ्याकल्टिज लगायतकाहरू पदस्थापनामा सरिक भएनन् ।’
EKANTIPUR
पौष २९ गते, २०७० मा प्रकाशित
