अर्घाखाँचीको खाँचिकोटस्थित मसिनालेकमा दुर्घटनाग्रस्त नेपाल वायु सेवा निगमको विमानमा सवार सबै १८ यात्रुको शव फेला

 

५ फागुन, ढिकुरा, अर्घाखाँची – आइतबार दिउँसोबाट हराएको नेपाल वायु सेवा निगमको ट्वीनअटर विमान अर्घाखाँचीको खाँचिकोट गाविसस्थित मसिनालेकमा दुर्घटनाग्रस्त अवस्थामा फेला परेको छ ।  जहाजमा सवार सबै यात्रुको निधन भएको छ। 

विमानमा सवार सबै १८ यात्रुको शव फेला परिसकेको छ। शवहरु क्षत विक्षत अवस्थामा छन्। शंकलन भएका शवमध्ये ४ जनाको शव केही चिनिने अवस्थामा छ। 

दुर्घटनास्थल समुन्द्र सतहदेखि करिब सात हजार फिट उचाईमा रहेको उद्दारमा रहेको नेपाली सेनाले जनाएको छ । जहाज खसेको भनिएको डाँडामा नेपाल टेलिकमको टावर पनि छ ।

यसअघि खिदिममा दुर्घटना भएको भनिएको थियो । मसिनेलेकको डाँडामा ठोकिएर जहाज दुर्घटना भएको अनुमान गरिएको छ । विमानका टुक्रा र मृतकको शवका टुक्रा २-३ सय मिटर वरपर छरपस्ट अवस्थामा भेटिएका छन् ।

मसिनेलेकमा रहेको टेलिफोन टावरको उत्तरपूर्व २ सय मिटर तल खोंचमा दुर्घटनाग्रस्त जहाज भेटिएको हो।

स्थानीय युवाहरुसँग बिहान हिउँ खेल्न जाने क्रममा करिब ६ बजे जहाजको सानो अवशेष फेला परेपछि खोजी गर्दै जांदा अन्य अवशेष पनि फेला पारेका हुन् ।

 

काठमाडौंबाट पोखरा हुँदै जुम्लाका लागि उडेको विमानमा चालक दलका सदस्य र एक बालकसहित १८ जना थिए । 

अन्तिम पटक १: १३ मा भैरहवा विमानस्थलसँग सम्पर्क हुँदा क्याप्टेनले मौसम खराव रहेको सूचना दिएका थिए । अपराह्नतिर त्रिभुवन विमानस्थल टावरका अधिकारीहरुले विमान अर्घाखाँचीको खिदिम जंगलमा दुर्घटना आशंका गरेका थिए ।