दाङ, फाल्गुन २७ । दाङको तुलसीपुरबाट दाङकै अमलिया जाँदै गरेको बा११च ११०८ नम्बरको जिप गएराति फूलबारी गाउँ विकास समिति वडा नम्बर १ भञ्याङमा दुर्घटना हुँदा सात जनाको मृत्यु भएको छ । दुर्घटनामा ६ जना गम्भीर घाइते भएका छन् ।
मृतक र घाइते सबै फूलबारी गाविसकै रहेका छन् । मृतकहरुमा फूलबारी ६ निवासी शंकर चौधरी, प्रविण खड्का, मधु योगी, गणेश केसी, खड्ग डांगी, रवि गिरी र पूर्णबहादुर वली रहेका छन् ।
घाइतेहरुको अवस्था पनि चिन्ताजनक रहेको दाङका प्रहरी उपरीक्षक सरदकुमार खत्रीले जानकारी दिए । घाइतेहरुको नेपालगञ्जस्थित कोहलपुर मेडिकल कलेजमा उपचार भइरहेको छ ।
जिप चालक पनि घाइते भएका छन् । चालकको साथबाट मदिरासमेत बरामद भएको प्रहरीले जनाएको छ । मदिरा सेवन गरेर जिप चलाएकै कारण दुर्घटना भएको बताइएको छ ।
जिपमा चालकसहित १३ जना यात्रु सवार थिए । पक्की सडकमा गएराति १२ बजे जीप सडकबाट ५० मिटर तल खसेर दुर्घटना भएको थियो । घटनास्थल सदरमुकामबाट ३५ किलोमिटर टाढा रहेको छ । IMAGECHANNELS
फाल्गुन २७ गते, २०७० मा प्रकाशित
