शोभाखर पन्थी
२०७० चैत्र १६ आईतवार जलुके , अर्घाखाँची । अर्घाखाँची जिल्लाको जलुके गाविसमा भिषण आगलागी भएको छ । जलुके-४ को पणेनीमा भएको आगलागीमा ५ परिवारका १० वटा घर गोठ जलेका छन् ।
आगलागीमा परि स्थानीय झबिन्द्र पुलामीको घर गोठ, एउटा भैसी, ५ वटा बाख्रा, घनश्याम अधिकारी, विशाल पुलामी, मधु पुलामी र वालसिंह राउतको घरगोठ, लत्ता कपडा, अन्नपात नगद, गर गहना, दारपात जलेर नष्ट भएका हुन् ।
बालबालिकाले आगो खेलाउँदा आगलागी भएको प्रहरीले जनाएको छ । आगो स्थानीय बासिन्दा र प्रहरीको लगातार ५ घण्टाको अथक प्रयास पछि नियन्त्रणमा आएको थियो । आगलागी पछि जिल्लाको विकट इलाका जलुकेका ५ परिवारको बिचल्ली भएको छ । विपन्न ५ परिवारका बासिन्दाहरु खाली आकासमुनी बारिमा बस्न बाध्य भएका छन् ।
उनीहरुलाई स्थानीय बासिन्दा र प्रहरी प्रशासनले खाने कुरा र ओड्ने ओछ्याउन कपडाको प्रबन्ध गर्ने तयारी गरेका छन् ।
आगलागीमा झण्डै ७० लाख मुल्य बराबरको क्षती भएको पीडित परिवारको भनाई छ । गर्मि बढे सँगै एक हप्तायता अर्घाखाँची जिल्लाको विभिन्न ठाउँमा आगलागिका घट्ना बढ्दै गएका छन् ।
चैत्र १७ गते, २०७० मा प्रकाशित
