चैत्र २६ । अमेरिकाको पेन्सिलभेनियास्थित एक विद्यालयमा विद्यार्थीहरुमाथि छुरा आक्रमण हुँदा २० जना भन्दा बढी घाइते भएका छन् । घटनापछि फ्रान्कलिन क्षेत्रिय माध्यमिक विद्यालयमा संदिग्ध एक विद्यार्थीलाई पक्राउ गरिएको स्थानीय सहयोगीलाई उदृत गर्दै एबीसी न्यूजले जनाएको छ ।
आक्रमणबाट घाइते हुनेहरु १४ देखि १७ वर्ष उमेर समूहको रहेको अधिकारीहरुले बताएका छन् । जसमा चार जनाको अवस्था गम्भीर रहेको छ । उनीहरु सबैलाई उपचारका लागि अस्पताल भर्ना गरिएको छ ।
घटनापछि सो विद्यालय बन्द गरिएको छ भने प्र्रहरीले विद्यालय परिसरमा खोजतलास गरिरहेको छ । कसले, कुन उद्देश्यका लागि विद्यार्थीहरुमाथि आक्रमण गरेको हो, भन्ने बारे भने स्पष्ट हुन नसकेको त्यहाँका प्रहरी अधिकारीहरुले बताएका छन् ।
विद्यालयका अधिकारीहरुले विद्यालयमा एक गम्भीर घटना भएको बताएका छन् । सो विद्यालयको प्राथमिक तहका कक्षाहरु रद्द गरिएको जनाइएको छ । -एजेन्सी
चैत्र २६ गते, २०७० मा प्रकाशित
