अर्जेन्टिनालाई पराजित गर्दै जर्मनीले २४ वर्षपछि विश्वकप फुटबलको उपाधि जितेको छ । सोमबार विहान भएको फाइनल भिडन्तमा अतिरिक्त समयमा अर्जेन्टिनालाई १-० गोल अन्तरले पराजित गर्दै जर्मनीले चौथो पटक विश्वकपको उपाधि उचालेको हो ।
यसअछि १९९० मा अर्जेन्टिनालाई नै हराउँदै जर्मनीले विश्व च्याम्पियन बनेको थियो । जर्मनी दक्षिण अमेरिकी भूमिमा विश्वकप जित्ने पहिलो युरोपेली मुलुक समेत बनेको छ ।
चार वर्षका लागि फुटबलको राजा छान्न माराकाना रंगशालामा भएको खेलमा जर्मनीका लागि ११३ औं मिनेटमा मारियो गोटेजले निर्णाायक गोल गरेका थिए । आन्द्रे सुर्लेको क्रसलाई छातिले नियन्त्रणमा लिँदै उनले आकर्षक गोल गरे ।
११७ औं मिनेटमा मेस्सीको हेडर बारको केहीमाथिबाट बाहिरियो भने ११९ औं मिनेटमा मेस्सीको फ्रिकिकले सही दिशा लिन नसकेपछि जर्मनीको जित पक्का भयो।
यसअघि निर्धारित ९० मिनेटको खेलमा अर्जेन्टिनाले गोल गर्ने सुन्दर अबसर खेल फालेको थियो । १९ औं मिनेटमा अर्जेन्टिनाका गोन्जलो हिगुइन वान भर्सेज वानमा चुकेका थिए । दोस्रो हाफमा मेस्सी र प्लासियोले गोल गर्ने मौका खेर फाले । जर्मन डिफेन्डर बेनेडिक्टको प्रहार बारमा लाग्दा हजारौं जर्मन समर्थक चुकचुकाएका थिए ।
१२० मिनेटको खेलमा अर्जेन्टिनाले एउटा पनि सर्ट टार्गेटमा पार्न सकेको थिएन । उसका नौं वटै प्रयासले फ्रेममा पर्न सकेको थिएन । तर, जर्मनीले भने पााच पटक अर्जेन्टिनी पोष्टमा धाबा बोलेको थियो ।
मेस्सीले जिते गोल्डेन बल, गोल्डेन बुट रोड्रिग्वेजलाई
अर्जेन्टिनाका लिओनल मेस्सी विश्वकप फुटबलको उत्कृष्ट खेलाडी बनेका छन् । उनले गोल्डेन बल जितेका छन् ।
कोलम्बियाका जेम्स रोड्रिग्वेजले भने पहिलो विश्वकपमा नै सवार्धिक गोलकर्ता बन्दै गोल्डेन बुट जितेका छन् । उनले पाँच खेलमा ६ गोल गरेका थिए । उनले जर्मनीका थोमस मुलर, अर्जेन्टिनाका लिओनल मेस्सी र ब्राजिलका नेयमारलाई पछि पारे । मुलरले ५ तथा मेस्सी र नेयमारले ४/४ गोल गरेका थिए ।
गोल्डेन बलका लागि मुलर, रोड्रिग्वेज, रोबिन, नेयमारसहित १० खेलाडी मनोनयनमा परेका थिए । अर्जेन्टिनालाई विश्वकपको फाइनलसम्म पुर्याएका मेस्सी उत्कृष्ट घोषित बने । उनले समूह चरणमा चार गोल गरेका थिए ।
जर्मन गोलरक्षक नुयुरले गोल्डेन ग्लोब जितेका छन् । प्रतियोगिताभर उनको प्रदर्शन उत्कृष्ट थियो । उत्कृष्ट गोलकिपर बन्दै गोल्डेन ग्लोब जित्ने क्रममा उनले अर्जेन्टिनाका रोमेरो र कोष्टारिकाका नाभासलाई पछि पारे ।
आषाढ़ ३० गते, २०७१ मा प्रकाशित
