ब्राजिलको दक्षिणी पैरेना राज्यको कास्काभेल सहरको एक कारागारमा भएको दंगामा चारजना कैदीको मृत्यु भएको छ । मृत्यु हुनेहरुमा दुईजनाको शिरछेदन गरिएको थियो भने दुई जनालाई छतबाट खसालिएको अधिकारीहरुले जनाएका छन् । घटनामा केही कैदी घाइते भएका छन् ।
११ सय ४० कैदी रहेका कारागारमा आइतबार बिहान करिब ७ सय कैदी अचानक हिंसा र तोडफोडमा उत्रिएका थिए । कैदीहरु कारागार सञ्चालन, खाना लगायतका विषयमा माग राख्दै आएका थिए ।
कैदीहरुले दुईजना सुरक्षा गार्डलाई नियन्त्रणमा लिएका छन् भने कारागारको धेरै क्षेत्र आफ्नो नियन्त्रणमा लिएका छन् । ब्राजिलका विभिन्न कारागारमा करिब ५ लाख कैदीहरु रहेको बताइन्छ । (एजेन्सी)
भाद्र ९ गते, २०७१ मा प्रकाशित
