कोमल भट्ट
पुरानो नैकाप, काठमाडौँ
हाल:- न्युयोर्क, अमेरिका
सधैँ झैं दुखाएर आयो तिहार
प्रवासी रुवाएर आयो तिहार
न बैनी दिदी छन् न ता दाजु भाइ
हितैषी छुटाएर आयो तिहार
कथा भैसके सेल,रोटी,अनर्सा
मिठासै हराएर आयो तिहार
भए स्वप्न टीका,मसाला र माला
नियाँस्रो लगाएर आयो तिहार
कतै दीप माला बलेनन् खुसीले
अँध्यारो बनाएर आयो तिहार
झर्यो आँसु सम्झेर द्यौसी र भैली
अतीतले सताएर आयो तिहार
ठगी भाग्यले आज डाँडा कटायो
मनै यो बिझाएर आयो तिहार
गयो भोक निन्द्रा हुँदा भित्र पिडा
सिरानी भिजाएर आयो तिहार
सके सम्म हामी भुलौँ कष्ट सारा
मनाऔं रमाएर आयो तिहार
( भुजङ्गप्रयात छन्द )
कार्तिक ६ गते, २०७१ मा प्रकाशित
