कोमल भट्ट
पुरानो नैकाप, काठमाडौँ
हाल:- न्युयोर्क, अमेरिका
ऐनाले खुच्चिङ गरेको हो कि
यो बैंश साँच्चै झरेको हो कि
बेचैन लाग्यो जवानी गुम्दा
तकदीर यस्तै परेको हो कि
तर्केर आफैँ विलाए इच्छा
मुस्कान खोलो तरेको हो कि
टुक्रेछ छाती छचल्की पीडा
मायालु अन्तै सरेको हो कि
ओइलेछ बेली चमेली जम्मै
आनन्द बेला टरेको हो कि
माधुर्य सारा हरायो मन्मा
डरलाग्छ तृष्णा मरेको हो कि
देखिन्न एउटै खुसीको बाटो
हे ! देव तैँले हरेको हो कि
यी केश पाके सबै नै ऐले
कालास्त्र सोझै छरेको हो कि
(बहरे सगीर अहज)
सूत्र:-२२१२ २१२२ २२
पौष १५ गते, २०७१ मा प्रकाशित
