काठमाडौं । राष्ट्रिय प्रजातन्त्र पार्टी जाजरकोटको जिल्ला समितिका सबैजना एमालेमा प्रवेश गरेका छन् ।
इमेजखबरमा समाचार छ । राप्रपाका पूर्वसहायक महामन्त्री तथा पूर्वसांसद गोविन्दविक्रम शाह, जिविस पूर्वसभापति धनबहादुर अधिकारी, जिल्ला अध्यक्ष कमान खड्का, उपाध्यक्ष, सचिव, सहसचिव, कोषाध्यक्षलगायत सबै जिल्ला समिति र क्षेत्रीय समिति एमालेमा प्रवेश गरेको हो ।
एमाले अध्यक्ष केपी ओली र महासचिव ईश्वर पोखरेलले नवप्रवेशी शाहलगायतलाई विहीबार पार्टी मुख्यालय बल्खुमा स्वागत गरेका थिए । राप्रपा जाजरकोटको महिला, जनवर्गीय, किसान, युवक संगठन पनि एमालेमा समाहित भएको एमालेले जनाएको छ ।
कार्यक्रममा एमाले अध्यक्ष केपी ओलीले पार्टी प्रवेशलाई जाजरकोट मोडलको रुपमा देशैभरि लैजाने बताए ।
पार्टीमा आउनेलाई सुरक्षा, सम्मान र अवसर प्रदान गर्ने उनको भनाइ थियो ।
नेपाली कांग्रेसको जीउडाल ठूलो भएपनि उसको जीउडाल पनि लामो समय नटिक्ने दाबी ओलीको थियो । इमेजखबरमा समाचार छ ।
फाल्गुन १ गते, २०७१ मा प्रकाशित
