उद्धारमा खटिएको अमेरिकी सेनाको यूएनएच-१-हुवे हेलिकप्टर दोलखाको सुनखानी क्षेत्रबाट सम्पर्कविहीन भएको छ।
मंगलबार दिउँसो गएको भूकम्पपछि भूकम्पको केन्द्रबिन्दु सुनखानीका लागि गएको हेलिकप्टर दिउँसो २ बजेदेखि सम्पर्कविहीन भएको हो । हेलिकप्टरमा कम्तिमा एक नेपाली र दुई अमेरिकी नागरिक सवार थिए।
नेपाली सेनाको उच्च स्रोतले हेलिकप्टर सम्पर्कविहीन भएको पुष्टि गरेको छ । सेनाले हराएको हेलिकप्टर खोज्न अमेरिकी सेनाको अर्को हेलिकोप्टर गएको तर फेला पार्न नसकेको जनाएको छ।
पौने सात बजेसम्म आइपुग्नु पर्ने अहिलेसम्म आइनपुगेको उच्च स्रोतले बतायो।
यसैबीच गृह मन्त्रालयका प्रवक्ता लक्ष्मीप्रसाद ढकालले पनि उद्धारका लागि गएको उक्त हेलिकप्टर राति साढे १० बजेसम्म सम्पर्कमा नआएको बताए । सेतोपाटीमा समाचार छ ।
बैशाख ३० गते, २०७२ मा प्रकाशित
