अमेरिकामा ५४ वर्षपछि पहिलो पटक क्यूवाको झण्डा फहराएको छ । अमेरिका र क्यूवाले कुटनीतिक सम्बन्ध पुनस्र्थापना गरेसँगै अमेरिकामा क्यूवाको झण्डा फहराउन थालेको हो ।
अमेरिकामा क्यूवाको दुतावास खुलेकोमा वाशिंटनमा एक औपचारिक कार्यक्रम आयोजना गरियो । क्यूवाका विदेशमन्त्री ब्रुनो रोड्रिगुएजको उपस्थितीमा दुतावास भवनमा क्यूवाको झण्डा फहराइँदा क्यूवाली नेता फिडेल क्यास्ट्रोका समर्थकले खुशीयालीमा नारा लगाएका थिए ।
अमेरिकी विदेशमन्त्री जोन केरीले आगामी महिना क्यूवामा आयोजना हुने यस्तै एक औपचारिक कार्यक्रमका सहभागिता जनाउने छन् । सो कार्यक्रम क्यूवामा अमेरिकी दुतावास खोल्न आयोजना हुने जनाइएको छ ।
गत डिसेम्बरमा अमेरिकी राष्ट्रपति बाराक ओबामा र क्यूवाका राष्ट्रपति राउल क्यास्ट्रोको ऐतिहासिक घोषणासँगै यी दुई देशबीच कुटनीतिक सम्बन्ध पुनः सुरु भएको हो ।
फिडेल क्यास्ट्रोको अगुवाईमा क्यूवामा भएको क्रान्तिसँगै सन् १९६१ मा दुई देशबीच कुटनीतिक सम्बन्ध बिच्छेद भएको थियो । जसअनुसार अमेरिकाले क्यूवासँग कुनै प्रकारको लेनदेनमा प्रतिबन्ध लगाउँदै आएको थियो ।
अमेरिका र क्यूवाबीच पुनः सम्बन्ध वहाल भएपछि क्यूवाका नागरिकमा उत्साह बढेको छ भने अमेरिकी लगानीकर्ता पनि क्यूवामा लगानीको सम्भावना खोज्न थालेका छन् । यद्यपी अमेरिकी लगानीकर्तालाई क्यूवा जान लगाइएको रोक अझै हटाइएको छैन ।
क्यूवामाथि अझै पनि विभिन्न प्रकारका अमेरिकी प्रतिबन्ध जारी छ । त्यसलाई हटाउन अमेरिकी संसदको स्वीकृती चाहिन्छ । क्यूवाले व्यापार प्रतिबन्ध अन्त्य नभएसम्म दुई देशबीचको कुटनीतिक सम्बन्ध पुनः सुचारु भएकोमा कुनै फाइदा नहुने बताउँदै आएको छ । (एजेन्सी)
श्रावण ५ गते, २०७२ मा प्रकाशित
