भारतको झारखण्ड राज्यमा रहेको देवघरमा एउटा मन्दिरमा भएको भागदौडमा कम्तीमा ११ जनाको मृत्यु भएको छ । सोमबार बिहानै वैद्यनाथ मन्दिरमा भक्तजनहरुबीच भागदौड भएको हो ।
देवघरका उपायुक्त अमितकुमारका अनुसार स्थानीय समयअनुसार सोमबार बिहान साढे चार बजे भक्तजनहरु मन्दिरमा जलाभिषेकका लागि लाइन लागेको बेलामा भागदौड मच्चिएको हो ।
श्रावणको सोमबार सो मन्दिरमा भक्तजनहरुले जल चढाउने गर्दछन् । जल चढाउनका लागि रातिदेखि नै लाइनमा बसेका भक्तजनबीच एकाएक अगाडी जान होडबाजी चल्दा भागदौड भएको हो ।
तर प्रत्यक्षदर्शीलाई उद्धृत गर्दै विभिन्न भारतीय संचारमाध्यमले जनाए अनुसार सत्सङ्ग चोकमा भक्तजनहरुको लाइन नियन्त्रित गर्नका लागि भन्दै प्रहरीले लाठीचार्ज गरेपछि भागदौड मच्चिएको हो ।
सो घटनामा अन्य १७ जना घाइते भएका छन् । घाइतेलाई उपचारका लागि स्थानीय अस्पतालमा भर्ना गरिएको छ ।
घाइतेमध्ये अधिकांश उत्तरप्रदेश र नेपालका नागरिक रहेको जनाइएको छ । (एजेन्सी)
श्रावण २५ गते, २०७२ मा प्रकाशित
