हंसपुर, अर्घाखाँची (अर्घाखाँचीडट्कम) । अर्घाखाँची जिल्लाको हंसपुर स्थित रखले गाउँमा पहिरो खस्न थालेपछि त्रासले १४ घरपरिवार विस्थापित भएका छन् ।
पहिरोले घरमै ढुङ्गा पुगेपछि पुस्तौँ देखि बस्दै आएको आफ्नो घर सम्पत्ति नै छाडेर छिमेकी गाविस बाँगी र टिमुरेगाउँमा बस्न वाध्य भएका छन् ।
उक्त गाउँका १४ घर परिवारका ७५ जना पहिरोको डरले गाउँ छाडेर टिमुरे गाउँमा कोठा भाडा र आफन्त इष्टमित्रकहाँ आश्रय लिएर बसेका छन् । उनीहरु सन्धिखर्क-सालझन्डी-ढोरपाटन सडक योजना अन्तर्गतको सडकको पहिरोबाट ठूला-ठूला ढुङ्गा बस्तीमा खसेपछि त्रसित बनेका हुन् ।
उनिहरुले अरुको घरमा बस्न निकै समस्या भएकोेले र पहिरो जतिबेला पनि खस्न सक्ने भन्दै सरकारले घरबासको व्यवस्था गरिदिनु पर्ने माग गरेका छन् ।
अविरल वर्षाका कारण ढुङ्गासहितको गाउँमाथिको डाँडो नै चिरैचिरा भएर खस्न थालेपछि उनिहरुले घरमा भएको अन्नपात र गाईभैँसी, बाख्रासमेत लिएर बस्ती नै छाडेका हुन् ।
यसअघि प्रमुख जिल्ला अधिकारी सुरेन्द्र पौडेलसहितको टोलीले विस्थापित गाउँको अवलोकन गर्नुका साथै सुरक्षित स्थानमा टहरा बनाइ बस्न भन्दै प्रतिघर पाँच हजार रुपैयाका दरले रकम प्रदान गरेको छ।
श्रावण २७ गते, २०७२ मा प्रकाशित
