सिरियामा आइएस विरुद्ध लड्न अमेरिकाले तालिम दिएका विद्रोही समूहले केही सैन्य हतियार अल कायदा आबद्ध अल नुस्रा फ्रन्टलाई बुझाएको खुलासा भएको छ ।
अमेरिकी सेनाले आफ्नो क्षेत्रबाट सुरक्षित आवत-जावतका लागि यो हप्ता मात्र विद्रोहीको एउटा युनिटले गोली गठ्ठासहितका ६ ओटा ट्रक बुझाएको जनाएको छ ।
अमेरिकाले दिएकामध्ये करिब एक चौथाई सैन्य सामग्री विद्रोही समूहले बुझाएको अनुमान गरिएको छ ।
अमेरिकी कंग्रेसले ५ हजार विद्रोहीलाई तालिम दिन ५० करोड अमेरिकी डलर दिन स्वीकृति जनाएको थियो । तर, तालिम प्राप्त ५४ जना भने अल नुस्रा फ्रन्टको आक्रमणमा परेको बताइन्छ ।
सिरियाका विभिन्न भू-भाग आफ्नो नियन्त्रणमा लिएको आइएसविरुद्ध लड्न चरमपन्थीका विद्रोही सेना तयार पार्न अमेरिकाले सघाए पनि यस्ता समूहमा आबद्ध हुनेहरु पाउन भने कठिन हुने गरेको छ । (एजेन्सी)
आश्विन ९ गते, २०७२ मा प्रकाशित
