ग्वाटेमालाको पूर्वी सहर एल काम्ब्रे डोसमा भारी वर्षापछि आएको पहिरोमा परी धेरैजनाको मृत्यु भएको छ ।
उद्धारकर्मीहरुले कम्तिमा २६ जनाको शव निकालेको बताएका छन् । पहिरोमा परी ६ सय मानिस हराइरहेकाले मृतकको संख्या बढ्न सक्ने अनुमान गरिएको छ । रातको समयमा पहिरो जाँदा सुतिरहेका मानिस बगेर बेपत्ता भएका हुन् ।
पहिरोमा पुरिएकामध्ये जीवित रहेका केहीले भने आफ्ना आफन्तलाई फोन र मेसेज पठाएर सम्पर्क गरेको स्थानीय अधिकारीहरुले जनाएका छन् ।
भारी वर्षा जारी रहेकाले खोज र उद्धार प्रभावित भएको बताइएको छ । (एजेन्सी)
आश्विन १६ गते, २०७२ मा प्रकाशित
