अमेरिकाले सिरियाको उत्तर पूर्वी क्षेत्रमा जिहादी समुह इस्लामिक स्टेट आईएस विरुद्ध संघर्ष गरिरहेका विद्रोही समुहलाई ४५ टनभन्दा बढी गोला बारुद उपलब्ध गराएको छ ।
लडाकु विमानको निगरानीमा सी-१७ विमानले हास्सकेह प्रान्तमा रातभर ती गालाबारुद खसालेको अमेरिकी रक्षा मन्त्रालय पेन्टागनका प्रवक्ताले पुष्टि गरेका छन् ।
खसालिएका गोला बारुदसँगै केही साना हतियार र ग्रेनेड रहेको र ती सबै विद्र्रोहीसम्म सुरक्षित रुपमा पुगेको बताइएको छ ।
केही दिन अघि अमेरिकाले आईएस विरुद्ध संघर्ष गरिरहेका विद्रोही समुहलाई प्रशिक्षित गर्न ५० करोड डलर दिने योजना रद्द गर्दै विद्रोही समुहका कमाण्डरलाई हतियार दिने निर्णय गरिएको थियो ।
अमेरिकाले सहयोग गरेका विद्रोही समुहले अमेरिकी हवाई आक्रमणको सहयोगमा उत्तरी सिरियाको ठूलो भूभागबाट आर्ईएसलाई भगाएका छन् ।
अहिले पनि सिरिया र इराकको ठूलो भूभाग आईएसको नियन्त्रणमा छ । यसैबीच उत्तर पश्चिम सिरियामा रुसी जेट विमानले पनि विद्रोहीको गढमा हवाई आक्रमण तीब्र पारेको छ ।
अमेरिकाले सहयोग गरिरहेका विद्रोही समुह विरुद्ध हवाई आक्रमण गरेको अमेरिकी आरोप भने रुसले अस्वीकार गर्दै आएको छ ।
सिरियामा राष्ट्रपति बसार अल असादको शासन विरुद्धको चार वर्ष यताको संघर्षले गृहयुद्धको रुप लिएको छ भने २ लाख ५० हजार भन्दा बढी मानिस मारिइसकेका छन् । (एजेन्सी)
आश्विन २६ गते, २०७२ मा प्रकाशित
