इस्लामिक विद्रोही संगठन आइएसले इजिप्टको साइनाइमा गत महिना विमान दुर्घटनामा प्रयोग गरेको बमको तस्वीर सार्वजनिक गरेको छ ।
आइएसले आफ्नो पत्रिकामा बमको तस्वीर सार्वजनिक गर्दै यही बमको प्रयोग गरेर रुसी विमान दुर्घटनाग्रस्त पारेको दाबी गरेको छ ।
गत महिना भएको विमान दुर्घटनामा २ सय २४ जनाको मृत्यु भएको थियो । आइएसको दाबिक नामक पत्रिकामा प्रकाशित तस्वीरमा पेय पदार्थको क्यान र डेटोनेटर जस्तो देखिने एउटा स्वीच छ ।
यो विस्फोटक पदार्थ वा बमले कसरी काम गर्छ भन्नेबारेमा केही जानकारी दिइएको छैन । सुरक्षा विशेषज्ञले पनि यो विषयमा अझैसम्म प्रष्ट पार्न सकेका छैनन् ।
आइएससँग सम्बन्धित एक गुटले आफूले बम आक्रमण गरेर रुसी विमान खसालेको दाबी गरेको थियो । रुसले भने अझै बम आक्रमणकै कारण विमान दुर्घटना भए नभएको स्पष्ट पारेको छैन ।
रुसी राष्ट्रपति भ्लादिमिर पुटिनले विमानमा आक्रमण गर्नेलाई नछाड्ने बताउँदै आएका छन् । (एजेन्सी)
मंसिर ३ गते, २०७२ मा प्रकाशित
