पेरिस हमलाको संदिग्ध मूख्य योजनाकार अब्देल हमीद अबाउद मारिएको पुष्टि भएको छ । फ्रान्सेली अधिकारीहरुका अनुसार बुधबार पेरिसमा भएको सुरक्षा कारवाहीमा हमलाका मूख्य योजनाकार अबाउद पनि मारिएका हुन् ।
पेरिस हमलामा १२९ जनाको मृत्यु भएको थियो भने अन्य तीन सय ५० जना घाइते भएका छन् ।
मोरक्को मूलका बेल्जियन नागरिक अब्देल हमील अबाउद सो हमलाका मूख्य योजनाकार रहेको अधिकारीहरुले जनाएका छन् । उनी कट्टरपन्थी उग्रवादी संगठन इस्लामिक स्टेट (आइएस) का सदस्य रहेको फ्रान्सेली सुरक्षा निकायले जनाएको छ ।
अबाउदको पालन पोषण ब्रसेल्सको मोलिनबीकमा भएको थियो जहाँ ठूलो संख्यामा आप्रवासीहरु बस्दै आएका छन् ।
फ्रान्सेली प्रहरीका अनुसार अबाउदका साथी अब्देसलाम भने फरार छन् । अबाउद र अब्देसलाम दुबैले बेल्जियममा सन् २०१० मा डकैतीको आरोपमा जेल सजाय भोगिसकेको तथ्य प्रकाशमा आएको छ । (एजेन्सी)
मंसिर ३ गते, २०७२ मा प्रकाशित
