बेल्जियमको ब्रसेल्समा भएका शृङ्खलाबद्ध विस्फोटमा संलग्न रहेको आशंकामा ६ जना पक्राउ परेका छन् ।
बेल्जियम प्रहरीले अभियुक्तहरुको खोजी गर्ने क्रममा उनीहरु पक्राउ परेका जनाएको छ । पक्राउ परेकाहरुका बारेमा विस्तृत विवरण भने सार्वजनिक गरिएको छैन ।
पक्राउ परेकाहरुमाथि अनुसन्धान जारी रहेको अधिकारीहरुले जनाएका छन् ।
ब्रसेल्समा मंगलबार भएको हमलामा ३१ जनाको मृत्यु भएको थियो ।
यसैबीच फ्रान्सका अधिकारीहरुले पनि ब्रसेल्स हमलामा सम्बन्ध रहेको आशंकामा एक जनालाई पक्राउ गरिएको जनाएका छन् । ब्रसेल्स हमलालाई गत वर्ष नोभेम्बरमा पेरिसमा भएको हमलासँग जोडेर हेर्ने गरिएको छ । पेरिस र ब्रसेल्स हमलाको जिम्मेवारी आतंकवादी संगठन इस्लामिक स्टेटले लिएको छ । (एजेन्सी)
चैत्र १२ गते, २०७२ मा प्रकाशित
