प्रेम खड्का
सन्धिखर्क, अर्घाखाँची ( अर्घाखाँचीडट्कम) । नेकपा एमाले निकट युवा संघ नेपाल रुपन्देहीका अध्यक्ष दुर्गा तिवारीकाे अाज रुपन्देहीमा गोली हानी हत्याको विरोधमा भोली देखि अनिश्चितकालीन अर्घाखाँची जिल्लामा बन्दको आव्हान गरिएको छ ।
युवा संघ नेपाल अर्घाखाँचीका अध्यक्ष गोविन्द आचार्यका अनुसार भोलि विहान ५ बजेदेखी हुने अनिश्चकालीन बन्दमा शैक्षीक संस्था, कलकारखाना, उद्योगधन्दा, बजार यातायात लगायत सम्पूर्ण क्षेत्र बन्द गरिने भएको छ । यस्तै अनिश्चितकालीन बन्द अर्घाखाँची लगायत लुम्बिनी अञ्चलका सबै जिल्लामा आव्हान गरिएको छ ।
यस्तै हत्या गरिएकाे बिराेधमा अर्घाखाँचीमा आज साँझ ५ देखि ६ बजेसम्म १ घण्टा चक्काजाम गरिएको थियो । तिवारीका हत्यारालाई शसक्त कारबाहीको माग गर्दै एमाले युवा संघ नेपाल अर्घाखाँचीले सन्धिखर्कमा गरेको चक्काजामका कारण केही समय यातायात प्रभावित भएको थियो । चक्काजामले छोटो एवम लामो दुरीमा चल्ने सवारीसाधन रोकिएका थिए ।
युवा संघ रुपन्देहीका अध्यक्ष दुर्गा तिवारीको गोली हानी हत्या गरिएको छ । तिवारी पाँच नम्बर प्रदेश विभाजन विरुद्धको आन्दोलनमा सक्रिय रहँदै आएका थिए ।
रुपन्देहीको देवदह नगरपालिका ढेकाबार कोलीयामा मोटरसाइकलमा आएका दुई अज्ञात व्यक्तिले उनीमाथि गोली प्रहार गरेका थिए ।
दिउँसो करिव साढे ३ बजे गोली लागी गम्भीर घाइते भएका तिवारीको देवदह मेडिकल कलेजमा उपचारका क्रममा मृत्यु भएको प्रहरीले जनाएको छ ।
– तस्बिर: फेसबूकबाट
पौष ४ गते, २०७३ मा प्रकाशित
