भूमिकास्थान नगरपालिकाका राष्ट्रिय जनमोर्चाका मेयर उम्मेदवार कविराम खनाल (दाँया) र उप-मेयर सकुन्तला राना ।
सन्धिखर्क, अर्घाखाँची ( अर्घाखाँचीडट्कम) । वैशाख ३१ गते हुने स्थानीय तहको निर्वाचनका लागि अहिले अर्घाखाँची जिल्लाका राजनीतिक दलहरु उम्मेदवार चयनको क्रममा छन्। निर्वाचनको नजिकिदै गर्दा यतिबेला जिल्लामा चुनावी सरगर्मी बढेको छ ।
जिल्लामा राजनीतिक दलहरुले आ- आफ्नो दललाई विजयी गराउन लागि परेका छन् । अर्घाखाँची जिल्लामा नेपाली कांग्रेस, नेकपा एमाले र राष्ट्रिय जनमोर्चा मात्र अगाडि रहेको देखिन्छ । यस्तै राजनीतिक दलहरुले जिल्लाका नगरपालिका, गाउँपालिकामा आ- आफ्ना उम्मेदवारले जित्ने दावी गरेता पनि नेकपा मसालको चुनावी मोर्चा राष्ट्रिय जनमोर्चाको जिल्लामा रहेका अन्य स्थानीय तहको तुलनामा भूमिकास्थान नगरपालिकामा मजबुत रहेको विश्लेषण गरिएको छ ।
भूमिकास्थान नगरपालिकामा साविक ७ गाबिस मध्ये ढाकावाङ, धारापानी, खिल्जी र असुरकोट राष्ट्रिय जनमोर्चाको मजबुत मानिन्छन् । थोरै मतदाता भएका साविक गाबिस नुवाकोट, ढिकुरा र धनचौरमा एमाले अगाडि छ । यस्तै नुवाकोटमा पनि राष्ट्रिय जनमोर्चाको अवस्था राम्रो रहेको छ । ढाकावाङ, धारापानी, खिल्जी र असुरकोटमा माओवादी शान्ती प्रक्रियामा आए लगतै केही मानिसहरु माओवादीमा गएपनि पछील्लो समय उनिहरु मसालमा फर्कीसकेका छन् भने मध्यस्त रहेकाले समेत अरुलाई भन्दा जनमोर्चाको गिलासमा भोट् दिने देखिन्छ ।
भूमिकास्थान नगरपालिकामा एमाले, कांग्रेस र माओवादी मिले मात्र राष्ट्रिय जनमोर्चालाई पराजित गर्न सक्नेछन् । यि ३ दल मिल्ने संभावना कम छ । साथै भूमिकास्थान नगरपालिका लगायत जिल्लाभर यतिबेला माओवादी केन्द्र निकै कमजोर भएको छ । माओवादी टुक्रा टुक्रा परेपछि अहिले मोहन वैद्य नेतृत्वको नेकपा क्रान्तिकारी माओवादी, बाबुराम भट्टराईको नयाँ शक्तीका कार्यकर्ता जिल्लामा फाटफुट चुनाव प्रचारमा हिंडेका देखिन्छ भने नेत्रविक्रम चन्द विप्लपको कम्युनिस्ट पार्टी चुनाव विरोधी गतिविधीमा लागेको देखिन्छ ।
उता राष्ट्रिय जनमोर्चाले अर्घाखाँचीमा स्थानिय निर्वाचनको लागि आफ्ना उम्मेदवारको घोषणा गरिसकेको छ । अन्य दलमा उम्मेदवादको चर्चा चले पनि अहिले सम्म कुनै दलले आधिकारीक रुपमा घोषणा गर्न सकेका छैनन् । यस्तै राष्ट्रिय जनमोर्चाले भूमिकास्थान नगरपालिकाको मेयर पदको लागि कविराम खनाल, उप- मेयरमा सकुन्तला रानालाई उठाएको छ । यि दुबै उम्मेदारको यस क्षेत्रमा बढी चर्चा भएको देखिन्छ । खिल्जीका हरी रोका भन्छन्’: २०६२ – ६३ देखि कांग्रेस, एमाले र माओवादीले निरन्तर सरकार चलाए तर देशलाई अहिले सम्म केही दिन सकेका छैनन् । लामो समय सम्म यि दलले सत्ता लडाईं बाहेक स्थानिय निर्वाचन गर्न सकेनन् । सविधान कार्यान्यवनको लागि चुनाव गर्न बाध्यता भएका कारण लगभग २ दर्शक पछि स्थानिय निर्वाचन भएको हो ।
राष्ट्रिय जनमोर्चा ढाकावाङ्ग गाउँ समितिकाे बैठकलाई सम्बाेधन गर्दै भूमिकास्थान नगरपालिकाका मेयर उम्मेद्वार कबिराम खनाल ।
१० वार्ड भएको भूमिकास्थान नगरपालिकामा १ मेयर १ उपमेयर गरि जम्मा ५५ जनाको नगर समिती चयन हुनेछन् । भूमिकास्थान नगरपालिकामा २१ हजार १ सय १६ कुल मतदाता रहेका छन् । जसमध्ये पुरुष ९ हजार ८ सय ८४ महिला ११ हजार २ सय ३२ जना रहेका छन् ।
यसपटकको स्थानीय तहको निर्वाचनमा अर्घाखाँची जिल्लाबाट कुल १ लाख २६ हजार ६ सय ९९ जना मतदाताले निर्वाचनमा भोट् हाल्दैछन् । जसमा पुरुष मतदाताको संख्या ६० हजार २ सय ९२ र महिला मतदाता ६६ हजार ४ सय ३ जना रहेका छन् । जिल्लाभर पुरुष मतदाता भन्दा ५ हजार ७ सय ११ जना महिला मतदाताको संख्या बढि छ । साथै जिल्लामा मतदान स्थल ९३ छन् भने १६६ मतदान केन्द्र संख्या रहेको छ ।
बैशाख ८ गते, २०७४ मा प्रकाशित
