अर्जुन भुसाल
नरपानी, अर्घाखाँची जेठ ८ । सन्धिखर्क नगरपालिका वडा नम्वर ६ नरपानीका विभिन्न ठाउँमा नेकपा एमालेका चुनावी सभाहरु सम्पन्न भएका छन् । वडा नम्वर ६ को बहखोर, नेटाकापोखरा भुवनडाँडा लगायतका ठाउँमा चुनावी सभाहरु सम्पन्न भएका हुन ।
नेकपा एमाले जिल्ला कमिटी सचिवालय सदस्य बुद्धिराम भुसालको प्रमुख आतिथ्यतामा सभाहरु भएका हुन ।
कार्यक्रममा सन्धिखर्क नगरपालिकाका मेयर पदका उम्मेद्वार कृष्ण प्रसाद श्रेष्ठ, उपमेयरकी उम्मेद्वार इश्वरा पोख्रेल, सन्धिखर्क विशेष नगर कमिटीका संयोजक युवराज श्रेष्ठ, सचिव श्रीकृष्ण भुसाल, अनेरास्ववियुका केन्द्रीय सदस्य भरत न्यौपाने, वडा नम्वर ६ का वडा अध्यक्षका उम्मेद्वार पृतम केसी, नायक शित्तल केसी, वडा सदस्यका उम्मेदवारहरुले समेत मन्तव्य राखेका थिए ।
कार्यक्रमका प्रमुख अतिथि भुसालले पहिलो चरणको निर्वाचनमा एमाले पहिलो शक्तिको रुपमा स्थापित भएको भन्दै दोस्रो चरणमा पनि भारी सिटका साथ पहिलो हुने दावी गर्नु भयो । उहाँले सन्धिखर्क नगरपालिका सहित जिल्लाका अधिकांश ठाउँमा एमालेले जित हासिल गर्ने बताउनु भयो ।
मेयर पदका उम्मेद्वार श्रेष्ठले सुन्दर, समृद्ध नगरपालिका बनाउनका लागि आफ्नो जित आवश्यक रहेको बताउँदै मत दिई बिजयी गराउन मतदातासँग आग्रह गर्नुभयो । उहाँले विकास निर्माणका काम देखि जनताका हरेक प्रकारका समस्याहरु समाधान गर्न आफू तयार रहेको बताउनु भयो ।
जेष्ठ ८ गते, २०७४ मा प्रकाशित
