अर्जुन भुसाल
पकले, अर्घाखाँची जेठ १० । सन्धिखर्क नगरपालिका वडा नम्वर ८ किमडाँडाका विभिन्न ठाउँमा नेकपा एमालेका चुनावी सभाहरु सम्पन्न भएका छन् । वडा नम्वर ८ का मुख्खेकाचौर, पकले, खापडाँडा, प्लसपाटा लगायतका ठाउँमा चुनावी सभाहरु सम्पन्न भएका हुन ।
कार्यक्रमका प्रमुख अतिथि नेकपा एमाले केन्द्रीय स्कूल विभागका सदस्य बुद्धि बहादुर रायमाझीले दास्रो चरणको स्थानीय तहको निर्वाचनमा पनि एमाले पहिलो शक्तिको रुपमा स्थापित हुने दावी गर्नु भयो । उहाँले एमालेले जिल्लाको सन्धिखर्क नगरपालिका देखि अधिकांश ठाउँमा विजयी हासिल गर्ने बताउँदै अब एमालेको जितलाई कसैले रोक्न सक्ने बताउनुभयो ।
सन्धिखर्क नगरपालिकाका मेयर पदका उम्मेदवार कृष्ण प्रसाद श्रेष्ठले आसन्न जेठ ३१ गते हुन लागेको स्थानीय तहको निर्वाचनमा सन्धिखर्क नगरपालिकाको मेयर पदमा आफूले भारी मतले विजयी हासिल गर्ने दावी गर्नुभयो । उहाँले एमालेको सरकार बनेपछि वृद्धाभत्ता पाँच पुग्ने भन्दै सन्धिखर्क नगरपालिकाको तर्फबाट पाँच सय भत्ता थप गरिदिने बताउनु भयो । उहाँले स्वास्थ्य उपचार नपाएर नगरवासीले पीडा खेप्नु नपर्ने बताउँदै स्वास्थ्य वीमा गरेर उपचारको व्यवस्था मिलाइने बताउनुभयो । उहाँले हरेक प्रकारका विकास निर्माणका कामहरुलाई दु्रत गतिमा अघि बढाउने गरि योजना तयार गरिएको बताउनुभयो ।
उपमेयरकी उम्मेद्वार इश्वरा पोख्रेलले एमालेले जति अझै सम्म कुनै पनि पार्टीले जनपक्षिय कामहरु नगरेको बताउनुभयो । उनले वृद्धा भत्ता, आफ्नो गाउँ आफै बनाउँ जस्ता लोकप्रिय कार्यक्रमले एमालेले जनताको मन जित्न सफल भएको बताउनुभयो ।
कार्यक्रममा सन्धिखर्क विशेष नगर कमिटीका सचिव श्रीकृष्ण भुसाल, पूर्व गाविस अध्यक्ष भरतमणि पौडेल, जिल्ला कमिटी सदस्य तथा वडा नम्वर ८ का वडा सदस्यका उम्मेद्वार नारायण आर्याल, जिल्ला कमिटी सदस्य वीरबहादुर सुनार, वडा नम्वर ८ का वडा अध्यक्ष पदका उम्मेद्वार इश्वरी प्रसाद भुसाल, वडा सदस्यका उम्मेद्वारहरु देवी थापा भुसाल, कमल पराजुली, कमला सुनार लगायतले मन्तव्य राख्दै मतदाताहरुसँग मत मागेका थिए ।
जेष्ठ १२ गते, २०७४ मा प्रकाशित
