अर्घाखाँचीमा प्रतिनिधिसभा र प्रदेशसभाका लागि अाज निर्वाचन हुँदै, सकेसम्म आजबाटै मतगणना शुरु गरिने

सन्धिखर्क, अर्घाखाँची (अर्घाखाँचीडट्कम) । दोस्रो चरण अन्तरगत प्रतिनिधिसभा र प्रदेशसभाका लागि अाज अर्घाखाँची जिल्लामा निर्वाचन हुँदैछ । निर्वाचनका लागि आज बिहान ७ बजे देखि अपरान्ह ५ बजे सम्म मतदान हुनेछ ।   

जिल्लामा  निर्वाचनका लागी एक लाख ३८ हजार ३ सय २८ जनाले मतदान गर्दैछन् । जिल्ला यसपटक ७० प्रतिशत अर्थात ९६,८२९ सम्म भोट् खस्ने अनुमान गरिएको छ । 

जिल्लाका ९३ मतदानस्थलका एक सय ७४ मतदान केन्द्रमा १३ सय ९९ कर्मचारी खटिएका छन् । एउटा मतदान केन्द्रमा एक मतदान अधिकृत, एक सहायक मतदान अधिकृत, चार सहायक कर्मचारी र दुईजना सहयोगीसहित आठ जनाको कर्मचारी हुन्छ । मतदान केन्द्र सुरक्षाको लागि तीन घेरामा सुरक्षाकर्मी तैनाथ छन् ।

यस्तै मतदान सकिएपछि सकेसम्म आज बिहीबारबाटै मतगणना प्रारम्भ गर्ने मुख्य निर्वाचन अधिकृतको कार्यालय अर्घाखाँचीले बताएको छ । चुनाव सकिए लगतै सर्वदलिय बैठक बस्नेछ । 

मतपेटिका आउन ढिला भएमा भोली शुक्रबाट मात्र मतगणना गरिनेछ । मतगणना गरिने सन्धिखर्कको टुडिखेल सभागृह हल तयारी अवस्थामा राखिएको छ । सिद्दारा, सिमलपानी, जुकेना, जलुके लगायत दुर्गम स्थानका मतपेटिका मध्यरातसम्म आईपुग्ने अनुमान गरिएको छ । 

सुरक्षाको लागि जिल्लामा ३ हजार सुरक्षाकर्मी परिचालन गरिएको छ ।  यस्तै सुरक्षा संवेदनशिलता रहेका क्षेत्रमा थप सुरक्षाबल परिचालन गरिएको छ । साथै प्रमुख जिल्ला अधिकारी खिमराज भुसालले जिल्लामा शान्ति सुरक्षाको स्थिति सामान्य रहेको बताउँदै निर्वाचनलाई असर पार्ने गतिविधि गरेर स्थिति गम्भीर बनाउन खोज्ने जो कोहीलाई सुरक्षा कर्मिले गोली ठोक्न पाउने अधिकार कानुनमा उल्लेख रहेको बताउनु भएको छ । 

निर्वाचनलाई भयरहित र शान्तिपूर्ण बनाउन जिल्लाभर म्यादी,जनपथ,सशस्त्र प्रहरी र नेपाली सेना लगायतका पर्याप्त सुरक्षाकर्मिको परिचालन गरिएको भुसालले बताए ।  साथै सुरक्षा चुनौती तपिएको खन्डमा थप सुरक्षा आवश्यक भएमा पन्ध्र मिनटमै सम्बन्धित क्षेत्रमा आवश्यक थप सुरक्षाबल पुग्ने व्यवस्था मिलाइएको उनले जानकारी दिए । 

उता मुख्य निर्वाचन अधिकृतको कार्यालय अर्घाखाँचीले बुधवार निर्वाचनको सम्पूर्ण तयारी पूरा भएको जनाएको थियो । मुख्य निर्वाचन अधिकृतको कार्यालय अर्घाखाँचीले पूर्णसुरक्षा व्यवस्था मिलाइएको भन्दै निर्धक्क भएर मताधिकार प्रयोग गर्न पनि मतदातालाई अपिल गरेको थियो ।

यस्तै, अपांगता, गर्भवती, सुत्केरी, ज्येष्ठ नागरिक, अशक्त वा बिरामी मतदातालाई प्राथमिकता दिइ मतदान गर्न पाउने व्यवस्था गरेको निर्वाचन कार्यालय अर्घाखाँचीले जनाएको छ ।

मुख्य निर्वाचन अधिकृतको कार्यालयले मतदाता परिचयपत्र लिन असमर्थ मतदाताले नागरिकता वा कुनैपनि मान्यताप्राप्त सरकारी परिचयपत्र लिएर मतदान गर्न पाउने व्यवस्था गरेको छ ।  

यस्तै अर्घाखाँचीभर मतदातालाई कुनै समस्या परेमा प्रमुख जिल्ला अधिकारी ९८५७००७७७७, प्रहरी नायब उपरीक्षक ९८५७००५५५५,सेना ९८५७०६६४७३,सशस्त्र ९८५१२५९८९४ लाई स्संपर्क गर्न सकिनेछ ।

मुख जिल्ला अधिकारी खिमराज भुसालका अनुसार जिल्लाको सम्पुर्ण स्थानमा शान्ती सुरक्षाको अबस्था चुस्त दुरुस्त भएको र कसैलाई केहि अप्ठ्यारो परेमा १५ मिनेटमा सुरक्षाकर्मिको टोली आइपुग्ने समेत बताएका छन् ।