रुसको राजधानी मस्कोमा बस दुर्घटना हुँदा चार जनाको मृत्यु भएको छ ।
स्लावियान्स्की बोलेवार्ड मेट्रो स्टेसन नजिकैको सब-वेको प्रवेशद्वारामा बस ठोक्किँदा अन्य ११ जना घाइते भएका छन् ।
बस सब-वेको सिँढीमा गएर ठोक्किएको हो । बस सब-वेको प्रवेशद्वारमा टनेलको छानोमा ठोक्किएर अड्किएको छ ।
यो आतंककारी घटना नरहेको रुसी अधिकारीले बताएका छन् । बस एक्कासी चल्न थालेको र आफूले ब्रेक लगाउन खोजे पनि सफल नभएको बसका चालकले बताएका छन् ।
दुर्घटनामा घाइते भएकाहरुको अवस्थासमेत गम्भीर रहेको छ । घटनाको विषयमा अनुसन्धान भइरहेको अधिकारीले बताएका छन् ।(एजेन्सी)
पौष ११ गते, २०७४ मा प्रकाशित
