कोमल भट्ट
पुरानो नैकाप, काठमाडौँ
हाल:- न्युयोर्क, अमेरिका
प्रभो ! तिमी छौ सबका सहारा
तिमी बिना छैन कतै किनारा
अतालिएको छु निकास खोजी
सहाय मेरो बन हे ! पियारा
बहे सधैँ भेल बनेर आँसु
निसासिए आज विचारधारा
खुसी भयो मेघ अकास छेक्दै
भए अँधेरा प्रिय चाँद तारा
बिमाख पार्यो सपना हुरीले
रहेछ क्यारे विधिको इशारा
विदीर्ण भो देह दुखेर धेरै
विदा भए हर्ष,उमङ्ग सारा
उतार डुङ्गा भवसिन्धु तारी
अफाल सम्पूर्ण कडा तगारा
निखार स्वामी ! सब वेदना यी
नटार मेरो दिलको पुकारा
छन्द :- उपेन्द्रवज्रा
सूत्र:- ISI SSI ISI SS
(५ अक्षरमा विश्राम )
फाल्गुन १४ गते, २०७४ मा प्रकाशित
