कोमल भट्ट
च.न.पा-१३
पुरानो नैकाप,काठमाडौँ
हाल:- न्युयोर्क,अमेरिका
**********
प्रभो ! डुब्न लागेँ बताऊ किनारा
तिमी प्राणदाता तिमी हौ सहारा
तिमी सर्वव्यापी तिमी हौ अनन्त
तिमी सुन्दछौ बेबसीको पुकारा
तिमी हौ विधाता तिमी स्नेहमूर्ति
सुखाशा तिमी हौ तिमी प्रेमधारा
उज्यालो छ ब्रह्माण्ड तिम्रो प्रभाले
तिमी चन्द्रमा हौ तिमी सूर्य,तारा
छ यो सृष्टि तिम्रै र संहार तिम्रै
तिमी बिघ्न हर्ता तिमी छौ पियारा
तिमी हौ कृपासिन्धु आनन्द छर्ने
तिमी तोड्दछौ दुर्दशाका तगारा
सधैँ वन्दना गर्छु सर्वेश ! तिम्रो
धुजा पार हे नाथ ! सन्ताप सारा
(भुजंगप्रयात छन्द )
चैत्र २७ गते, २०७४ मा प्रकाशित
