विश्व स्वास्थ्य दिवस विभिन्न कार्यक्रम गरी आज मनाइँदै छ ।
हरेक वर्ष अप्रिल ७ का दिन मनाइने दिवसको अवसरमा यो वर्ष ‘विश्वव्यापी स्वास्थ्य सेवा ः सबैका लागि, सबैतिर’ भन्ने नारा तय गरिएको छ ।
दिवसकै सन्दर्भमा विश्व स्वास्थ्य संगठनले राजधानीको वसन्तपुरमा हस्ताक्षर संकलन एवं चित्रकला प्रदर्शनी गरेको छ ।
स्वास्थ्य सेवामा सर्वप्यापी पहुँचको लक्ष्य हासिल गर्न माग गर्दै संकलित हस्ताक्षर र चित्रकला स्वास्थ्य तथा जनसंख्या मन्त्रालयलाई बुझाइने आयोजक संस्थाको तयारी छ ।
विश्व स्वास्थ्य संगठनले दक्षिण एसियाली मुलुकमा करिब ८० करोड जनसंख्या अझै पनि अत्यावश्यक स्वास्थ्य सेवाको पहुँचबाट वञ्चित रहेको तथ्यांक सार्वजनिक गरेको छ । संगठनले आम्दानीको अधिकांश हिस्सा औषधीमूलो मै खर्च हुँदा ६ करोड ५० लाख जनसंख्या गरिवीको रेखामा रहेको जनाएको छ ।
स्वास्थ्य सेवा नागरिकको आधारभूत अधिकार भएर पनि अझै सवैको पहुँचमा पुग्न सकेको छैन ।
स्वास्थ्य सेवालाई सर्वव्यापी र सर्वसुलभ बनाउने जोड दिँदै विश्व स्वास्थ्य दिवस मनाउने गरिन्छ ।
स्वास्थ्य सेवालाई सर्वसुलभ र पहुँचयोग्य बनाउन पहल भइरहे पनि ती पर्याप्त नरहेको विश्व स्वास्थ्य संगठनले जनाएको छ ।
विश्वको आधा जनसंख्याले अझै पनि आवश्यक पर्ने स्वास्थ्य सेवा पाउन सकेको छैन ।
हरेक वर्ष स्वास्थ्यका लागि प्याकेज बजेटको व्यवस्था नहुँदा विश्वका १० करोड मानिस गरिबीको अवस्थामा पुग्ने गरेका छन् ।
नेपालमा पनि हरेक वर्ष सामान्य औषधि अभावका कारण अकालमा धेरैको ज्यान जाने गरेको छ ।
सरकारले स्वास्थ्य सेवालाई प्रभावकारी बनाउने बताए पनि अझै पनि ग्रामीण क्षेत्रमा स्वास्थ्य संस्था र औषधिकै अभाव छ ।
संविधानमा स्वास्थ्य सेवालाई मौलिक हकका रुपमा राखिएको छ ।
यसलाई सम्बोधन गर्न स्वास्थ्य बिमा कार्यक्रम लागू भएको छ । तर यो कार्यक्रम प्रभावकारी हुन सकेको छैन । रासस
चैत्र २४ गते, २०७५ मा प्रकाशित
