‘आफैंबाट सुरु गरौं, औलोलाई शून्यमा पुर्याऔं भन्ने नारासहित बिहीबार विश्व औलो (मलेरिया) दिवस विभिन्न कार्यक्रम गरी मनाइँदैछ ।
विश्व स्वास्थ्य संगठनको आह्वानमा नेपालमा २०६५ सालदेखि यो दिवस मनाउन थालिएको हो ।
इपिडिमियोलोजी तथा रोग नियन्त्रण महाशाखाकाअनुसार नेपालमा ११ सय ८७ जनामा औलोरोग देखिएको छ ।
सुदूरपश्चिमका जिल्लाहरुमा बढी देखिएको औलोरोग हाल उच्च पहाडी र हिमाली जिल्लामासमेत देखापर्न थालेको छ ।
औलोरोगबाट २० जिल्लाका ४९ वडा बढी जोखिममा रहेको इपिडिमियोलोजी तथा रोग नियन्त्रण महाशाखाका निर्देशक डा. विवेककुमार लालले जानकारी दिए ।
उनले हालसम्म ६ लाख १० हजारजनालाई औलोरोग नियन्त्रण गराउने झुल वितरण गरिसकेको बताए ।
सरकारले औलोरोगको उपचार र औषधि निःशुल्क गरेको छ ।
सरकारले यो वर्ष औलोरोग नियन्त्रणका लागि दुई करोड ५० लाखको औषधि, झुलका लागि ७५ लाख र विषादीका लागि तीन करोड ३५ लाख रुपैयाँ रकम विनियोजन गरेको छ ।
औलोरोगका कारण नेपालमा हालसम्म तीनजनाकोमात्र मृत्यु भएको सरकारको दाबी छ ।
सरकारले सुन् २०२५ सम्ममा औलोमुक्त नेपाल बनाउने लक्ष्य लिएको छ । ‘एनोफिलिज’ जातको संक्रमित पोथी लामखुट्टेको टोकाइबाट औलोरोग सर्दछ । हरेक वर्ष अप्रिल २५ तारिखमा यो दिवस मनाइन्छ । इमेजखबरमा समाचार छ ।
बैशाख १२ गते, २०७६ मा प्रकाशित
