नेपालगन्ज उपमहानगरपालिका–४, गणेशपुरस्थित बाइपासमा रहेको एक ग्यारेजमा रोकिराखेको बसमा आगलागी भएको छ ।
आगलागीबाट ना४ख ७०२४ र ना५ख २४६५ नम्बरको बस जलेर पूर्णरुपमा क्षति भएको हो ।
ग्यारेजमा मर्मत भइरहेको ना५ख २४६५ नम्बरको बसमा बिहान १०ः३० बजे एक्कासि विद्युत् सर्ट हुँदा आगलागी भएको र सोही बसनजिकै रोकिराखेको अर्को ना४ख ७०२४ नम्बरको बसमा आगो सल्कँदा दुवै बस जलेर पूर्णरुपमा नस्ट भएका छन् ।
बसमा आगलागी भएलगत्तै स्थानीयवासीले नेपालगन्जस्थित बारुणयन्त्रलाई खबर गरेका थिए ।
खबर पाएलगत्तै घटनास्थलमा पुगेको बारुणयन्त्र, स्थानीय, नेपाल प्रहरी, सशस्त्र प्रहरीले १२ बजे आगो नियन्त्रणमा लिएका थिए । केही ढिलो पुगेका कारण दुवै बस पूर्णरुपमा जलेको स्थानीयवासीको भनाइ छ ।
आगलागीबाट भएको क्षतिको यकिन विवरण भने नखुलेको स्थानीय वडा प्रहरी कार्यालयका इन्चार्ज प्रहरी निरीक्षक नारायण डाँगीले बताए । रासस
बैशाख ३१ गते, २०७६ मा प्रकाशित
