जिल्ला अस्पताल ताप्लेजुङमा विरामीको चाप ह्वात्तै बढेको छ । पछिल्ला केही दिनयता दैनिक सयौँको संख्यामा विरामीहरु अस्पताल पुग्ने गरेका छन् ।
एक हप्ता अघिसम्म दैनिक ५० जना विरामी आउने गरेकामा चार दिनयता दैनिक १ सयभन्दा बढी विरामी आएको अस्पतालले जनाएको छ ।
गाउँका स्वास्थ्य संस्थामासमेत रुघा, खोकी र ज्वरोका विरामीको चाप बढेको बताइएको छ
वर्षाका कारण पानीका मुहानहरु प्रदुषित हुने भएकाले अधिकांश पानीजन्य रोगका विरामी आउने गरेको निमित्त अस्पताल प्रमुख डा. सोनिङ लामाले बताए ।
विरामीको चाप बढेपछि स्वास्थ्य सेवा प्रवाहमा समस्या भएको छ ।
दरवन्दी अनुसारका कर्मचारी नहुँदा लामो समयदेखि समस्याग्रस्त अस्पतालमा अहिले ४ जना डाक्टरले भ्याउनुपर्ने बाध्यता छ ।
अस्पतालमा पर्याप्त कर्मचारी नभएपछि प्रदेशको सामाजिक विकास मन्त्रालयमा पहल गरिएको डा. लामाको भनाइ छ ।
यता हालै कर्मचारी समायोजनले अस्पतालका ९ जना कार्यालय सहयोगी अन्यत्रै गएपछि विरामी र औषधीको व्यवस्थापन लगायतमा समस्या भएको बताइएको छ । जनस्वास्थ्यको गोदामबाट अस्पतालसम्म औषधी पुर्याउने कर्मचारी पनि छैनन् । इमेजखबरमा समाचार छ ।
श्रावण १६ गते, २०७६ मा प्रकाशित
