इराकस्थित अमेरिकी सेनाको हवाई अखडामा गरिएको आक्रमणमा ८० अमेरिकी सैनिक मारिएको दावी इरानी सञ्चार माध्यमहरुले गरेका छन् ।
स्वतन्त्र रुपमा पुष्टि नभएको खबरमा तेहरान टाइम्सले लेखेको छ, ‘इरानी क्षेप्यास्त्र आक्रमणमा इराकस्थित अमेरिकी सैन्य शिविरमा ८० जना मारिएको र २ सय जना घाइते भएका छन् ।’
घाइते भएकाहरुलाई तत्कालै हेलिकोप्टरबाट अन्यत्रै ओसारिएको दावी पनि उक्त खबरमा उल्लेख छ । २० वटा महत्वपूर्ण स्थानमा आक्रमण गरिएको दावी पनि उसको छ ।
अमेरिकी ड्रोन आक्रमणमा आफ्ना सैन्य कमाण्डर कासिम सुलेमानी मारिएपछि क्रुद्ध इरानले बुधबार विहानै इराकस्थित दुई अमेरिकी सैन्य शिविरमा दर्जनौं मिसाइल आक्रमण गरेको थियो ।
अमेरिकाले भने इरानी आक्रमणबाट कुनै क्षति नभएको जनाएको थियो । राष्ट्रपति डोनाल्ड ट्रम्पले ट्वीट गर्दै आक्रमणको समीक्षा भइरहेको र अहिलेसम्म सबै ठीक रहेको जनाएका थिए । एजेन्सी
पौष २३ गते, २०७६ मा प्रकाशित
