बुटवलको कोरोना अस्थायी अस्पतालमा आइतबार मृत्यु भएका युवकमा कोरोना भाइरस (कोभिड–१९) को संक्रमण नरहेको पुष्टि भएको छ । चैत ६ गते दुबईबाट आएपछि उच्च ज्वरो र खोकी देखिएका ३४ वर्षीय बाबुराम थापाको थ्रोट स्वाब टेकुस्थित राष्ट्रिय जनस्वास्थ्य प्रयोगशालामा सोमबार दुईपटक परीक्षण गरेर हेर्दा दुवै रिपोर्ट नेगेटिभ देखिएको कोरोना अस्थायी अस्पताल बुटवलका डा. विष्णु गौतमले बताए ।
रिपोर्टमा संक्रमण नदेखिएपछि उनका मृत्युको कारण अझै खुलेको छैन। पहिलो रिपोर्ट नै नेगेटिभ देखिएपछि प्रयोगशालाले दोस्रोपटक परीक्षण गरेर पनि हेरेको उनले बताए।
थापा प्रदेश ५ सरकार र बुटवल उपमहानगरपालिकाले सञ्चालन गरेको कोरोना अस्थायी अस्पतालको आइसोलेसन वार्डमा चैत १३ गते भर्ना भएका थिए। सामान्य अवस्था रहेको उनमा आइतबार एक्कासी स्वासप्रश्वासमा समस्या देखिएपछि काठमाडौं पठाउने तयारी गर्दागर्दै मृत्यु भएको उपचारमा खटिएका अस्पतालका फोकल पर्सन डा. सुदर्शन थापाले बताए।
पाल्पाको रिब्दीकोट गाउँपालिका–५ घर भएका उनी रुपन्देहीको सैनामैना नगरपालिका–४ सिसौडाँडामा डेरामा बस्दै आएका थिए। दुबईमा ट्याक्सी ड्राइभरको काम गर्दै आएका उनी सामान्य बिरामी भएपनि कोरोनाको त्रासले उपचार नपाएरै मृत्यु भएको आरोप श्रीमती रिता थापा क्षेत्रीले लगाएकी छन्।
उनका ७ र १० वर्षका दुई छोरा छन्। आइतवार मृत्यु भएपनि सोमबारसम्म उनका आफन्त पनि शब बुझ्न अस्पताल आएका छैनन्।
दुबईबाट फर्के लगत्तै मुर्गियास्थित आचार्य मेडिकलमा स्वास्थ्य परिक्षण गराएका थापाले टाइफाइडको औषधि सेवन गरेका थिए। निरन्तर ज्वरो र खोकी देखिएपछि स्थानीयको दबाबमा कोरोना परिक्षण गराउन बुटवलस्थित लुम्बिनी प्रादेशिक अस्पतालमा गएका थिए। त्यहाँबाट कोरोना संक्रमणको आशंकामा बुटवलकै कोरोना अस्थायी अस्पतालमा पठाइएपछि उनको आइसोलेसनमा राखेकै अवस्थामा मृत्यु भएको थियो। कान्तिपुरमा समाचार छ ।
चैत्र १७ गते, २०७६ मा प्रकाशित
