स्वास्थ्य तथा जनसंख्या मन्त्रालयले कैलाली र कञ्चनपुर जिल्लामा ‘र्यापिड डाइगोनेस्टिक टेस्ट’का लागि स्वाबको नमुना संकलनलाई तीव्र बनाइएको जनाएको छ ।
मन्त्रालयको नियमित ‘प्रेस ब्रिफिङ’मा मंगलबार मन्त्रालयका प्रवक्ता डा. विकास देवकोटाले कञ्चनपुरबाट एकै दिन २१ र कैलालीमा १८ जनाको परीक्षण गरिएको जानकारी दिए ।
यस्तै, जुम्लामा पनि स्वाब संकलन भइरहेको प्रवक्ता डा. देवकोटाले जानकारी दिए ।
४५० भन्दा बढीको नमुना संकलन गर्ने मन्त्रालयको लक्ष्य रहेको भन्दै उनले हरेक पछिल्लो परीक्षणमा कुनैपनि संक्रमित फेला नपरेको बताए ।
हालसम्म एक हजार ८९० जनको स्वास्थ्य परीक्षण गरिएको र देशभर १०० जना ‘आइसोलेसन’मा रहेको जानकारी दिए ।
वीरेन्द्र सैनिक अस्पतालले सशस्त्र प्रहरी र नेपाल प्रहरी अस्पतालका कर्मचारीलाई ‘कोभिड–१९’ को उपचारसम्बन्धी तालिम दिएको पनि डा. देवकोटाले जानकारी दिए ।
निजी स्वास्थ्य संस्थाका चिकित्सक तथा स्वास्थ्यकर्मीहरुलाई आवश्यकतानुसार परिचालन गरी तहगतरुपमा सुविधा प्रदान गर्ने विषयमा छलफल भइरहेको पनि उनले बताए । इमेजखबरमा समाचार छ ।
चैत्र २५ गते, २०७६ मा प्रकाशित
