अर्घाखाँचीमा समुदायमा कोरोना फैलिएपछि नरपानी क्षेत्रमा सिल (सम्पूर्ण विवरण सहित)

सन्धिखर्क, अर्घाखाँची  (अर्घाखाँचीडट्कम) । अर्घाखाँची जिल्लामा समुदायमा कोरोना फैलिएपछि सन्धिखर्क नगरपालिका वार्ड नम्बर ६ नरपानीलाई सिल गरिएको छ ।

यस अघि कोरोना पोजेटिभ पुष्टि भएका नरपानीका एक तरकारी व्यापारीसँग नजिक भएका ४ जना नागरिकमा आईतबार कोरोना पुष्टि भएपछि नरपानीलाई सिल गरिएको छ ।

उनिहरूको सोमबार पिसिआर परिक्षणका लागि स्वाब पठाईने छ ।

अर्घाखाँचीमा आईतबार आएको रिपोर्टमा समुदायका ४ जना सहित ११ जना कोरोना सक्रमित थपिएका छन् । प्राप्त रिपोर्ट अनुसार ७ जना क्वारेन्टाइनमा बसेका र ४ जना सक्रमित नजिक रहेका समुदायका रहेका छन् । एकसाता अघि कोरोना पोजेटिभ देखिएका सन्धिखर्क ६ का तरकारी व्यापारी सँग नजिक रहेर घुलमेल गरेका सोही वडाका ३ जना पुरूष र १ जना महिलालाई आईतबार कोरोना पुष्टि भएको जनस्वास्थ्य निरिक्षक गणेशराज पौडेलले बताए । उनिहरू सन्धिखर्क ६  जगतका तरकारी व्यापारी ३१ बर्षिय पुरूषको ६५ बर्षिय आमा र त्यहिबाट तरकारी बोकेर कपिलवस्तु रूपन्देही र सन्धिखर्क बजारमा बिक्रीवितरण गर्न लैजाने गाडी चालक लगायत २२ बर्ष देखि ३० बर्ष भित्रका  ३ पुरूष रहेका छन् । उनिहरू व्यापारी सँग नजिक रहेका स्थानियबासीन्दा हुन् । 

एक साता अघि गाउँका एक जना तरकारी व्यापारीलाई कोरोना देखिएको थियो तर उनका नजिक रहेर घुलमेल गरिरहेका थप ४ जनामा आईतबार कोरोना देखिएपछि आफुले गाउँ सिल गर्न नगरपालीका र जिल्ला प्रशासन कार्यालय अर्घाखाँचीलाई आग्रह गरिएको वडा अध्यक्ष कृष्ण आचार्यले बताए ।   

एक साता अघि जिल्ला सिचाई कार्यालय प्रमुख र जनस्वास्थ्यमा कार्यरत दुई जना स्वास्थ्यकर्मीलाई कोरोना पुष्टि भएको थियो । जिल्लामा सक्रिय कोरोना संक्रमितको संख्या ३६ पुगेको छ ।