काठमाडौँ ।
युगदर्शन डट्कमले पहिलो वर्ष पूरा गरी दोस्रो वर्षमा प्रवेश गरेको अवसरमा समारोह सम्पन्न भएको छ । २०७७ असोज ७ गते यस अनलाइनले दोस्रो वर्षमा प्रवेश गरेको अवसरमा कपन काठमाडौँमा सो कार्यक्रम सम्पन्न भएको हो ।
कार्यक्रममा प्रमुख अतिथि युगदर्शन डट कमका अध्यक्ष आनन्द शर्मा हुनुहुन्थ्यो । सो अवसरमा सङ्क्षिप्त मन्तव्य राख्दै उहाँले अहिले डिजिटल युग भएको बताउँदै युगअनुसार सञ्चार माध्यमको स्वरूपमा पनि परिवर्तन भइरहेको बताउनुभयो । एक वर्षअघि युगदर्शन डट कमका सामु अप्ठ्यारो परिस्थिति रहे पनि अहिले स्थिति क्रमशः सहज बन्दै गइरहेको उहाँको भनाइ थियो । युगदर्शन डट कमले दोस्रो वर्षमा प्रवेश गरेकोमा उहाँले सम्बन्धित सबैलाई धन्यवाद ज्ञापन गर्दै आवश्यक सहयोगका लागि सबैसित अपिलसमेत गर्नुभयो ।
कार्यक्रममा राष्ट्रिय जनमोर्चाका महासचिव जनकराज शर्मा र अखिल नेपाल किसान महासङ्घ (अप्फा) का अध्यक्ष भैरवराज रेग्मीले पनि मन्तव्य राख्नुभएको थियो ।
युगदर्शन डट कमका सम्पादक विद्यानाथ अधिकारीको अध्यक्षता तथा व्यवस्थापक हरिकान्त शर्माको स्वागत मन्तव्यका साथ अघि बढेको उक्त कार्यक्रमको सञ्चालन प्रकाश थापा मगरले गर्नुभएको थियो ।
कार्यक्रममा मधु क्षेत्रीले कविता वाचन गर्नुभएको थियो भने सहिदको सम्मानमा एक मिनट मौनधारण गरिएको थियो ।
आश्विन ७ गते, २०७७ मा प्रकाशित
