न्युजिल्याण्डमा इच्छामृत्युको पक्षमा मतदान

न्युजिल्याण्डमा इच्छामृत्युको पक्षमा मतदान भएको छ । न्युजिल्याण्डका मतदाताले युथनेजिया (इच्छामृत्यु) लाई कानूनी मान्यता प्रदान गर्ने पक्षमा मत दिएका हुन् ।

अभियन्ताहरुले यसलाई करुणा र दयाका लागि जित रहेको बताएका छन् ।

प्रारम्भिक मत परिणाम अनुसार इच्छामृत्युलाई वैधता प्रदान गर्ने सम्बन्धी कानून कार्यान्वयनमा ल्याउने पक्षमा ६५.२ प्रतिशत मत परेको छ ।

कानून अनुसार गम्भीर बिरामी परेका व्यक्तिले दुई डाक्टरबाट स्वीकृति पाएमा इच्छामृत्यु प्राप्त गर्न सक्ने छन् । यसका लागि त्यस्ता बिरामीको जीवनकाल ६ महिना भन्दा कम रहेको जानकारी डाक्टरले दिएको हुनु पर्छ ।

सो कानूनको विपक्षमा रहेकाहरुले भने त्यसमा सुरक्षात्मक उपायको कमी रहेको बताउँदै आएका छन् ।

शुक्रबार घोषणा गरिएको जनमत संग्रहको नजितामा झण्डै चार लाख ८० हजार विशेष मत समावेश छैन । सोही कारण जनमत संग्रहको अन्तिम परिणाम नोभेम्बर ६ मा मात्रै घोषणा हुनेछ । तर अहिले नै इच्छामृत्युको पक्षमा ठूलो समर्थन मिलेकाले नतिजामा असर भने गर्ने छैन ।

जनमत संग्रहको नतिजा लागु गर्न सरकार बाध्य रहेकाले सो कानून आउँदो वर्ष (२०२१) को नोभेम्बरमा लागु हुनेछ ।

विश्वमा सीमित देशले मात्रै इच्छामृत्युलाई कानूनी मान्यता दिएका छन् । नेदरल्याण्डस र क्यानडासँगै न्युजिल्याण्ड पनि अब इच्छामृत्युलाई मान्यता दिने देशको सूचिमा सामेल हुने भएको छ ।

इच्छामृत्युलाई प्रधानमन्त्री ज्यासिन्डा आर्डर्न र विपक्षी नेतृ जुडिथ कोलिन्सले पनि समर्थन गरेका छन्। एजेन्सी