हरि कुँवर / अर्घाखाँचीडट्कम संवाददाता
सन्धिखर्क, अर्घाखाँची (अर्घाखाँचीडट्कम)। अर्घाखाँची जिल्लामा काेराेनाका कारण थप एक जना व्यवसायीकाे ज्यान गएकाे छ ।
काेराेनाका कारण शितगंगा नगरपालिका वार्ड नं २ सितापुरका ३६ बर्षिय प्रेम बिसीकाे उपचारकाे क्रममा बुधवार बिहान १०:५७ भैरहवा मेडिकल कलेजमा ज्यान गएकाे हाे । उनले सन्धिखर्कको मेनराेडमा श्रमिक इलेक्ट्रिक पसल गर्दै आएका थिए ।
कार्तिक २४ गते स्वाव संकलन गरि २५ गते काेराेना संक्रमण पुष्टि भएको थियो । उनलाई २९ गते भैरहवा मेडिकल कलेजमा भर्ना गरिएको थियो ।
बिसी रिटर्नी माइग्रेट नेपाल अर्घाखाँचीका सक्रिय सदस्य समेत रहेका थिए । रिटर्नी माइग्रेट नेपाल अर्घाखाँचीका अध्यक्ष बसन्त केसीले घटना प्रति दुख व्यक्त गरेका छन् ।
योसँगै अर्घाखाँची जिल्लामा काेराेनाका कारण मृत्यु हुनेको संख्या ९ जना पुगेको छ ।
यस्तै अर्घाखाँची जिल्लामा आजसम्म संक्रमितको संख्या ६२१ जना पुगेको छ । जसमा सन्धिखर्क नगरपालिकामा २७० जना, शितगंगा नगरपालिकामा १००, भूमिकास्थान नगरपालिकामा १२७, मालारानीमा ७६, पाणिनी गाउँपालिकामा २० र छत्रदेव गाउँपालिकामा २८ जना संक्रमित रहेका छन् ।
जिल्लाका विभिन्न आईसोलेशनबाट आजसम्म ५६४ जनाले कोरोना जितेर घर फर्केका छन् । जसमा सन्धिखर्क नगरपालिकामा २२० जना, शितगंगा नगरपालिकामा ९८, भूमिकास्थान नगरपालिकामा १२४, मालारानीमा ७५, पाणिनी गाउँपालिकामा १९ र छत्रदेव गाउँपालिकामा २८ जनाले कोरोनालाई जितेका हुन् ।
जिल्लाका बिभिन्न स्थानका आईसोलेशनमा ४९ जना सक्रिय संक्रमितहरु उपचाररत रहेको जिल्ला प्रशासन कार्यालय अर्घाखाँचीले जनाएको छ ।
मंसिर ३ गते, २०७७ मा प्रकाशित
