काठमाडौं । संवैधानिक परिषद्ले सिफारिस गरेका विभिन्न संवैधानिक निकायका पदाधिकारीहरूले आज शपथ लिएका छन ।
राष्ट्रपति कार्यालय, शितल निवासमा आयोजित कार्यक्रममा पदाधिकारीहरुले शपथ लिएका हुन् ।
संवैधानिक निकायका प्रमुखहरूलाई प्रधानन्यायाधीश चोलेन्द्रशमशेर राणा र अन्य सदस्यलाई सम्बन्धित निकायका प्रमुखले शपथ दिलाउनु भएको थियो ।
कार्यक्रममा राष्ट्रपति विद्या भण्डारी, प्रधानमन्त्री केपी शर्मा ओली र राष्ट्रिय सभाका अध्यक्ष गणेशप्रसाद तिमिल्सिना उपस्थित हुनुहुन्थ्यो ।
संवैधानिक परिषदले सर्वसम्मत निर्णय गर्नुपर्ने प्रावधानलाई बहुमत सदस्यको उपस्थितिमा निर्णय गर्न सक्ने अध्यादेश लागु गरी प्रधानमन्त्री ओलीले आफूनिकटका व्यक्तिहरुलाई संवैधानिक निकायहरुमा नियुक्ति दिलाएकामा सर्वोच्च अदालतमा मुद्दा नै परेको छ ।
सभामुख अग्नि सापकोटा र प्रमुख प्रतिपक्षी दलका नेता शेरबहादुर देउवा अनुपस्थित परिषद बैठकले नियुक्तिका लागि सिफारिश गरेको थियो ।
आफै उपस्थित बैठकले गरेका नियुक्तिविरुद्ध आफै नेतृत्वको सर्वोच्च अदालतमा परेको रिटको सुनुवाईसम्म पेशीमा नराखी टार्दै आउनुभएका प्रधानन्यायाधीश जबराले विभिन्न आयोगमा अध्यक्ष तथा सदस्य बनेकाहरुलाई शपथ दिलाउनुभएको हो ।
संवैधानिक परिषद्ले अख्तियार दुरुपयोग अनुसन्धान आयोगका प्रमुख आयुक्त, राष्ट्रिय मानव अधिकार आयोगका अध्यक्ष, समावेशी आयोगका अध्यक्षलगायत ११ संवैधानिक निकायमा ४५ जनाको नाम नियुक्तिका लागि सिफारिश गरेको थियो ।
तर अध्यादेशअनुसार बसेको संवैधानिक परिषद्को बैठकले गरेका सिफारिश अवैधानिक रहेको दावीसहित सर्वोच्च अदालतमा रिट निवेदन दायर गरिएको छ । ती रिट निवेदनहरुमाथि सुनुवाई हुन सकेको छैन ।
३० मंसिरमा बसेको संवैधानिक परिषद् बैठकले संवैधानिक आयोगमा रिक्त रहेको ४५ जना पदाधिकारी तथा सदस्यहरू नियुक्तिका लागि सिफारिश गर्ने निर्णय गरेको थियो ।
सो निर्णय संवैधानिक परिषद्ले ५ पुसमा संसद् सचिवालयमा पठाएको थियो । सिफारिश भएकाको ४५ दिनभित्र निर्णय दिन नसके स्वतः नियुक्ति हुने प्रावधान रहेको छ ।
५ पुसमा संसदीय सचिवालयमा पुगेको सो पत्र २० माघमा परिपक्व भएको कानुन न्याय तथा संसदीय मामिला मन्त्रालयले जनाएको छ । इमेजखबरमा समाचार छ ।
माघ २१ गते, २०७७ मा प्रकाशित
