अर्घाखाँचीडट्कम संवाददाता
सन्धिखर्क, अर्घाखाँची (अर्घाखाँचीडट्कम) । अर्घाखाँची जिल्लाको मालारानी गाउँपालिका वार्ड नम्बर ५ बाँगीकी एक महिलाको आज उपचारका क्रममा बुटवलको कोरोना विशेष अस्थायी अस्पतालमा मृत्यु भएको छ ।
बाँगीकी ७९ वर्षीया एक महिलाको चैत २७ गते कोरोना संक्रमण पुष्टि भई सोही दिन अस्पताल भर्ना भएकोमा सोमबार बिहान ९:५० बजे मृत्यु भएको हो ।
उनलाई ज्वरो, निमोनिया, दम र श्वास–प्रश्वासमा समस्या थियो । जिल्लामा कोरोनाका कारण १५ जनाको निधन भएको छ ।
जिल्लामा आजसम्म संक्रमितको संख्या ८०८ जना पुगेको थियो । जसमा सन्धिखर्क नगरपालिकामा ३८३ जना, शितगंगा नगरपालिकामा ११०, भूमिकास्थान नगरपालिकामा १३७, मालारानीमा ९१, पाणिनी गाउँपालिकामा ३३ र छत्रदेव गाउँपालिकामा ५४ जना संक्रमित रहेका छन् ।
यस्तै जिल्लाबाट आजसम्म ७८८ जनाले कोरोना जितेर घर फर्केका छन् । जसमा सन्धिखर्क नगरपालिकामा ३७६ जना, शितगंगा नगरपालिकामा १०६, भूमिकास्थान नगरपालिकामा १३२, मालारानीमा ८९, पाणिनी गाउँपालिकामा ३१ र छत्रदेव गाउँपालिकामा ५४ जनाले कोरोनालाई जितेका हुन् ।
आजसम्म जिल्लाका बिभिन्न स्थानका आईसोलेशनमा ५ जना सक्रिय संक्रमितहरु उपचाररत रहेको जिल्ला प्रशासन कार्यालय अर्घाखाँचीले जनाएको छ ।
उता यस्तै अर्घाखाँचीमा पछिल्लो समय कोरोनाभाइरस परीक्षण गर्नेहरुको संख्यामा पनि कमी आएको बताइएको थियो । जिल्लामा पुन: कोरोना खोप लगाउने कार्यक्रम जारी छ ।
चैत्र ३० गते, २०७७ मा प्रकाशित
