एजेन्सी
भारतको राजधानीमा नयाँ दिल्लीमा सोमबारदेखि मेट्रो ट्रेनको सेवा फेरि सुचालु गरिएको छ ।
कोरोना भाइरसको दोस्रो लहरका कारण अस्तव्यस्त भएको दिल्लीमा संक्रमणको दर घटेसँगै मेट्रो रेल सेवा फेरि थालनी गरिएको हो ।
कोरोना संक्रमण बढेपछि लगाइएको लकडाउन बिस्तारै खोल्ने क्रममा गत १० मे मा रोक लगाइएको मेट्रो सेवा फेरि शुरु गरिएको हो ।
यद्यपि, अहिले भने ५० प्रतिशत मात्रै यात्रु राखेर चलाउन अनुमति दिइएको छ । जोर बिजोर बार पारेर पसलहरु पनि खोल्न दिइएको तर सुरक्षाका उपायहरु भने पालना गर्नुपर्ने मुख्यमन्त्री अरविन्द केजरीवालले जनाएका छन् ।
दिल्लीमा गत अप्रिलमा दैनिक १० हजार नयाँ संक्रमित फेला परेको थियो भने आइतबार ३८१ जनामा मात्रै संक्रमण फेला परेको जनाइएको छ ।
बितेको २४ घण्टामा भारतभर एक लाख ६३६ जनामा संक्रमण देखिँदा २ हजार ४२७ जनाको मृत्यु भएको छ ।
भारतमा जम्मा संक्रमित भने अहिलेसम्ममा २ करोड ८९ लाख पुगेका छन् । मृत्यु हुनेको संख्या पनि ३ लाख ४९ हजार नाघेको छ । २३ करोड २७ लाखलाई खोप लगाइसकिएको पनि बीबीसी हिन्दीले जनाएको छ । एजेन्सी
जेष्ठ २४ गते, २०७८ मा प्रकाशित
