बिष्णुकुमार आले | अर्घाखाँचीडट्कम संवाददाता
वाणगंगा (अर्घाखाँचीडट्कम) । मोटरसाईकल दुर्घटनामा परि अर्घाखाँची सन्धिखर्क नगरपालिका वार्ड नम्बर १ का एक युवाको निधन भएको छ ।
सन्धिखर्क १ पुरानो बाणिज्य बैक ( हाल ट्राफिक कार्यालय ) का देबी बहादुर खड्काका ३१ बर्षिय छोरा दान बहादुर खड्काको कपिलवस्तु जिल्लाको वाणगंगा ८ चप्परगाउँमा आईतबार दिउँसो भएको मोटरसाइकल दुर्घटनामा परि निधन भएको हो ।
मोटरसाइकल दुर्घटनामा परि घाइते भएका खड्काको चौराह अस्पताल बुटवलमा उपचारको क्रममा गएराती मृत्यु भएको थियो ।
पुर्वबाट पश्चिम तर्फ जाँदै गरेको बागमती प्रदेश ०२ ०२५ प १०२६ नम्बरको मोटरसाईकल र विपरित दिशाबाट आउदै गरेको लु ३ त ४७०१ नम्बरको ट्याक्टर एक आपसमा ठोक्किदा मोटरसाइकलको पछाडि सवार गरेका खड्काको ज्यान गएको हो । मोटरसाइकल चालक अर्घाखाँची सन्धिखर्क १ का २८ बर्षिय सिबु केसीको अवस्था पनि गम्भीर रहेको कपिलवस्तु जिल्ला प्रहरी प्रवक्ता डिएसपी धर्मराज भण्डारीले जानकारी दिए ।
घाईते केसीको चौराह अस्पताल बुटवलमा उपचार भैरहेको प्रहरीले जनाएको छ । ठक्कर दिने ट्याक्टर र चालकलाई प्रहरीले नियन्त्रणमा लिएको छ ।
खड्का बिदेश जाने सिलसिलामा बुटवलमा कोरोना खोप लगाएर छिमेकी भाईसँग घर फर्कने क्रममा मोटरसाइकल दुर्घटनामा परेका थिए ।
श्रावण ११ गते, २०७८ मा प्रकाशित
