अर्घाखाँचीडट्कम संवाददाता
अर्घातोष, अर्घाखाँची (अर्घाखाँचीडट्कम) । अर्घाखाँची जिल्लाको मालारानी गाउँपालिका वार्ड नम्बर १ मा नेपाली कांग्रेसले वार्ड अध्यक्ष बालाकृष्ण आचार्यलाई ध्यानाकर्षण पत्र बुझाएको छ।
आ.ब २0७८/0७९को बार्षिक योजनामा रकम विनियोजित गर्ने सिलसिलामा क्षेत्रीयताको आधारमा एकलौटी रूपमा रकम विनियोजित गरिएकोले अध्यक्षको ध्यानाकर्षण गरिएको हो।
उक्त पत्र बुझ्दै आचार्यले कांग्रेसको ध्यानाकर्षण पत्रलाई आफुले सकारात्मक रूपमा लिएको र तत्कालै वार्डको बैठकमा छलफल गराउने प्रतिबद्धता जनाउनु भएको छ।
उक्त ध्यानाकर्षण पत्र वार्डमा बुझाउने क्रममा सभापति भरत थापा उपसभापति लिलाम्वर आचार्य, प्रेम बहादुर पाण्डे, सचिब रविलाल भुसाल, स-सचिब मिनप्राद सुवेदी, सदस्यहरु ठाकुर प्रसाद खनाल, डिल बहादुर बि क, कुसुम जि सी, चन्द्रकान्त भुसाल लगायत नेपाली कांग्रेस मालारानी १ गाउँकार्य समितिको नेतृत्वमा ध्यानाकर्षण पत्र आचार्यलाई बुझाईएको थियो।
सो कार्य उपर छलफल गरि माग सुनुवाइ नभएमा कांग्रेसले चरणबद्ध रूपमा रचनात्मक आन्दोलन गर्न बाध्य हुने ध्यानाकर्षण पत्रमा उल्लेख गरेको छ।
श्रावण ११ गते, २०७८ मा प्रकाशित
