अर्घाखाँचीडट्कम संवाददाता
पटौटी, अर्घाखाँची (अर्घाखाँचीडट्कम) । अर्घाखाँची जिल्लाको पाणिनी गाउँपालिकाभर बन्द गरिएका विद्यालयहरूमा भौतिक उपस्थिति गराई पठनपाठन शुरु भएको छ ।
पाणिनी गाउँपालिकामा कोभिड–१९ को दोस्रो लहर फैलिएसँगै बन्द गरिएका धेरै जसो विद्यालयहरूमा आज सोमबारदेखि भौतिक उपस्थिति गराई पठनपाठन शुरु भएको हो ।
यहाँका सबै विद्यालयहरूमा सुरक्षाका सबै मापदण्ड पालना गरी एक बेन्चमा २ जना राखेर पठनपाठन शुरु गरिएको छ ।
पाँच महिनापछि विद्यालयहरू जाँदा विधार्थीहरु उत्साहित देखिएका थिए । साथै विधार्थीहरुलाई दिदै आएको दिवाभोजलाई पनि निरन्तरता दिएको छ ।
उता हिजी आईतबारबाट शितगंगा नगरपालिकाका सबै विद्यालयहरू खुलेका छन् ।
उता जिल्लाका पाणिनी गाउँपालिका र शितगंगा नगरपालिका बाहेक अन्य स्थानिय तहले कोभिड–१९ को दोस्रो लहर फैलिएसँगै बन्द गरिएका विद्यालयहरूमा भौतिक उपस्थिति गराई पठनपाठन थाल्ने तयारी गरेका छन् ।
वैकल्पिक विधिबाट कक्षा सञ्चालन गर्दै आएका स्थानीय तहले संक्रमण घट्दै गएपछि विद्यालय खोल्ने तयारी थालिएको बताएका छन् ।
जिल्लाका सन्धिखर्क नगरपालिका, भूमिकास्थान नगरपालिका, मालारानी गाउँपालिका र छत्रदेव गाउँपालिकाले विद्यालयहरू खोल्न शिक्षक र अभिभावकसँग छलफल गर्ने तयारी गर्ने बताएका छन् ।
जिल्लाका सबै पालिकाका शिक्षा, युवा तथा खेलकुद शाखाले पनि स्वास्थ्य मापदण्ड पालना गरेर विद्यालय सञ्चालन गर्न लागिएको बताएका छन् ।
उता जिल्ला प्रशासन कार्यालय अर्घाखाँचीले भौतिक उपस्थिति हुने गरी पठनपाठन नगर्न, कोचिङ तथा ट्युशन सेन्टर नचलाउन निर्देशन दिएको छ ।
जिल्लामा दोस्रो पटक गत वैशाख २१ गते मंगलवारदेखि निषेधाज्ञा जारी गरिएको थियो ।
भाद्र २१ गते, २०७८ मा प्रकाशित
