सन्धिखर्कमा एकीकृत समाजवादीको बृहत कार्यकर्ता भेला सम्पन्न | अर्घाखाँचीमा एमालेलाई हराउन गठबन्धनको कुरा मिलिसक्यो: नेपाल (भिडियो, फोटो सहित)

सन्धिखर्क, अर्घाखाँची (अर्घाखाँचीडट्कम) । अर्घाखाँची जिल्लाको सदरमुकाम सन्धिखर्कमा नेपाल कम्युनिष्ट पार्टी (एकीकृत समाजवादी ) को बृहत कार्यकर्ता भेला सम्पन्न भएको छ ।

सन्धिखर्कमा आज शनिवार एकीकृत समाजवादी जिल्ला कमिटि अर्घाखाँचीको आयोजनामा बृहत कार्यकर्ता भेला सम्पन्न भएको हो ।

‘अब राष्ट्रिय सभा चुनाव हुँदैछ, त्यहाँ गठबन्धनकै साझा उम्मेदवार बनाउँछौं,’ नेकपा (एस) अर्घाखाँचीले शनिबार सन्धिखर्कमा आयोजना गरेको कार्यकर्ता भेलालाई सम्बोधन गर्दै नेपालले भने, ‘चुनावमा ५ दलीय गठबन्धनले साझा उम्मेदवार उठाएर एमालेलाई पत्तासाफ पार्ने सल्लाह गरेका छौं । चुनावबाट ओली एमाले पुरै पत्तासाफ हुन्छ ।’ उनले अर्घाखाँचीमा उपचुनाव गर्ने कि एक वर्षपछि एकैपटक चुनाव गर्नेबारे छलफल भइरहेको बताए ।

अर्घाखाँचीमा एमाले उम्मेदवारलाई हराउन गठबन्धनको साझा उम्मेदवार बनाउन कुरा मिलिसकेको नेपालले दाबी गरे । संविधान कुल्चिएर प्रतिगामी दक्षिणपन्थी बाटोतिर लाग्ने ओली एमालेको भविष्य अब नरहने उनको भनाइ थियो । उनले अर्घाखाँचीमा पनि गठबन्धन बलियो बनाउने गरी लाग्न नेता, कार्यकर्तालाई निर्देशन दिए । ‘संघ र प्रदेश सरकारबाट बढारिएको एमालेलाई अब आउँदो चुनावमा पत्तासाफ हुन्छ र सूर्यमा ग्रहण लागिसक्यो, काम लाग्दैन,’ नेपालले भने, ‘अब कलम चम्किन्छ । जे गर्छ कलमले गर्छ ।’